Үүнэр сылга Сатаҕай нэһилиэгэ бүүс бүтүннүү оһох оттон бүтэр кыахтанна. Нэһилиэккэ иккис улахан кыамталаах, 4.2 МГБ-таах хочуолунай бииргэ үлэлээһин түмүгэр тутуллан үлэҕэ киирдэ.
Сатаҕай нэһилиэгэ улуус кииниттэн биир тэйиччи сытар нэһилиэк буолар. Манна баһылыгынан үһүс болдьоҕунан талыллыбыт Семен Давыдов үлэлиир. Бу кэмнэр усталарыгар кини ОДьКХ учаастактааҕы начальнига Иосиф Никитины кытта биир сүбэнэн, нэһилиэктэригэр улахан кыамталаах хочуолунайдары тутууга, дьон-сэргэ сылаас дьиэҕэ, оһох оттор кыһалҕатын билбэт буолалларын туһугар турууластылар.
Сатаҕай нэһилиэгэр ыаллар ититэр ситимҥэ холбонон, дьиэлэрин толору хааччыллыыга көһөн букатын да куораттардыы олорорго дьулуһаллар. Нэһилиэк толору киин ититэр ситимҥэ холбоноругар аны биир хочуолунай тутуллуохтаах этэ. Ону күүскэ туруорсаннар, улуус, ОДьХК Амматааҕы филиала уонна нэһилиэк дьаһалтата бииргэ үлэлээһиннэрин түмүгэр бу күннэргэ, сабыс саҥа хочуолунай турбалара буруоларын унаарыттылар.
Улуус дьаһалтата уонна нэһилиэк 1.5 мөл. солк., ОДьКХ 15 мөл. солк көрөннөр ахсынньы тымныытын аахсыбакка, саҕаламмыт үлэ ситэриллэн, сылааһы биэрэр эбийиэк үлэҕэ киирдэ. «Бу хочуолунай киирдэн, ыалларбытын барытын 100 бырыһыан киин ититэр ситимҥэ холбуур кыахтанабыт. Манна 3 хочуол турда«, — диэн үөрэ-көтө этэллэр ОДьКХ Амматааҕы филиалын директора Анатолий Нестерев уонна учаастак салайааччыта Иосиф Никитин.
Бу хочуолунайга ыаллары сэргэ, өссө уһуйаан холбонон, толору хааччыллыыга киириэ. Онон кырачааннар эмиэ аныгылыы усулуобуйаҕа сылдьар кыахтаналлар.
«Амма олоҕо» хаһыат
