Амма нэһилиэгин дьаһалтата үбүлээн, олохтоохтору көҕүлээн, бүтүн нэһилиэгинэн сомоҕолоһон Айыы дьиэтин туттулар. Онон Амма олохтоохторо айыылары кытта алтыһар, саха итэҕэлин үөрэтэр, арчыланар дьиэлэннилэр.
«Айыы дьиэтин тутуутугар аан бастаан педагогичекай улэ бэтэрээнэ Мария Никитина кыттыһарын биллэрэн, пенсиятыттан 14000 солк , онтон урбаанньыт Мария Петрова 100000 солк. уу харчынан аҕалан биэрбиттэрэ. Онтон урбаанньыт Людмила Куприянова ититэр ситим бары матырыйаалынан хааччыйбыта, атын улуус бизнеһинэн дьарыктанааччылара эмиэ ким да туора турбакка күүс-көмө буолбуттара. Кинилэргэ дьаһалта аатыттан барҕа махталбын биллэрэбин», — диэтэ нэһилиэк баһылыга Василий Слепцов.
Айыы дьиэтин Борис Борисов биригээдэтэ олус кыһаллан, бары сиэри-туому тутуһан туран оҥордо. Дьиэ ортотугар турар Аал луук маһы маастар Апполлон Захаров чочуйан таһаарда.
Бу үөрүүлээх күҥҥэ күндү ыалдьыттарынан Айыы кыһата түмсүү түсчүтэ Лазарь Афанасьев-Тэрис, Александр Друзьянов буоллулар. Норуот маастара Валентина Стручкова итэҕэлгэ анаммыт баайыы панноларын бэлэхтээбитэ Айыы дьиэтин олус киэргэтэр.
Айыы дьиэтин тутуута 2011 сыллаахха норуот тутуутунан саҕаламмыта. Ол сыл 300-тэн тахса тыһыынча солк., онтон 2015-2016 сылларга 800-тэн тахса тыһыынча солк. хомуллан киирбитэ. Көмө биэрбит тэрилтэлэр, биирдиилээн дьон аата-суола барыта суруллан киирэр аартыкка бэлиэ сиргэ көрдөрүлүннэ.
