Үс өрүттээх сөбүлэһии түмүгэр Амма улууһун кытыы нэһилиэгэ сыл бүтүөр диэри оптоволоконнай сибээскэ холбонуо. Амма Наахара олохтоохторо күүстээх Интернет ситимин түргэнник аҕалаары остуолба маһын бэлэмнэһэллэр.
Амма Наахараҕа оптоволоконнай сибээс тардыллан эрэр. Ол курдук «Эксперт-групп» диэн Евгений Керемясов салайааччылаах интернет сибээһинэн дьарыктанар чааһынай тэрилтэ, нэһилиэк уонна улуус дьаһалтата Сөбүлэһии түһэрсэн, илии баттастылар. Бу тэрилтэ 2015 сыллаахтан Амма улууһун кытта ыкса үлэлээн, билигин элбэх нэһилиэк уйаара-кэйээрэ биллибэт интернетинэн күүскэ туһана олорор.
Билигин Амма Наахараҕа нэһилиэк баһылыга Мария Захарова олохтоохтору кытта сүбэлэһэннэр, оптоволокно ситимэ кэлэр остуолбаларын бэлэмнииргэ үлэлэһэ сылдьаллар. Улуустан бу үлэни баһылыгы тутууга солбуйааччы Дмитрий Иванов сүрүннүүр.
— Уопсайа 476 остуолба наада. Билигин 160 остуолба туруорулунна, бэйэбит олохтоох уолаттарбыт өссө 150 остуолбаны бэлэмнии сылдьаллар. Онон эбии 170-ча остуолба наада. Үп-харчы кырыымчык. Ол да буоллар субуотунньуктар игин бэрээдэктэринэн бу үлэни толоруохпут. Түргэн сибээс кэлэрэ биһиэхэ олус наада. Нэһилиэнньэ кэтэһэр, — диир баһылык Мария Романовна. Ил Түмэн дьокутаата Руслан Еремеевич:
— Бу маннык нэһилиэги кытта бииргэ үлэлээһин түмүгэр Чакырга, Покровкаҕа, Болугурга оптоволоконнай сибээс кэлэн турар. Онон остуолбалар бэлэмнэннилэр да тэрилтэ үлэлээн Саҥа дьылга диэри Амма Наахараҕа күүстээх сибээс линията тардыллыа, — диэтэ.
Ааптар: Наталья Бубякина
This post was published on 31.10.2018 17:32 17:32