Амма улууһун фермерэ Игорь Петров быйыл “Агротарстап” бырагырааманан саҥа хотон тутуутун түмүктээн эрэр. Ахсынньы 6 күнүгэр эбийиэгин арыйар былааннаах.


Покровка нэһилиэгин бааһынай хаһаайыстыбатын салайааччыта Игорь Петров саҥа үлэлээн эрэр “Агростартап” бырагыраамаҕа киирсэн кыайыылаах тахсыбыта. Кытаанах талыыны ааһан, бизнес-бырайыага кыайан, быйыл кини хаһаайыстыбата кыстыгы саҥа хотоҥҥо көрсөр кыахтанна.

“Бу олус үчүгэй бырагыраама. Бу суоҕа эбитэ буоллар, мин өссө уон сыл хотон да туттуом, техника да ылыныам суоҕа этэ. Онон фермер атаҕар турарыгар олус көмөлөөх. Элбэх кыттааччы баарыттан бастаан кандидакка ааһан, онтон кыайыылаах тахсаммын, хотоммун туттан үлэҕэ киллэрдим, сыалбын ситтим”, — диэн үөрэн туран этэр Игорь Петрович.

Кини хаһаайыстыбатыгар 40-ча сүөһүлээх, өссө эбии сибиинньэ иитэр. Бу иннинэ эргэ хотонун салҕаан, өрөмүөннээн турбута. Хотоно олус тымныы буолан ньирэйдэр да, сибиинньэлэр да тоҥоллоро.

Билигин кэргэнинээн Александралыын бэйэлэрэ бырайыактаан туппут хотонноругар 65 сүөһү, үс ийэ сибиинньэ оҕолорун кытта кыстыыллар. “Хотонум толору буоллун диэн дьонтон 20–тэн тахса сүөһүнү көрө ыллым. Билигин сааһыран сүөһүлэрин көрбөт дьон элбээтэ. Онон кинилэр хаһаайыстыбаларын тутан хаалалларыгар көмө да буолар”, — диэн этэр хаһаайыстыба баһылыга.

Саҥа хотон эркиннэрэ уонна үрдэ сэндвич-панель матырыйаал, онтон түннүгэ 8 мм поликарбонат. Маһын бэйэтэ тыаҕа тахсан бэлэмнээбит. “Бу хотоммун туттарбар өссө улахан көмөнү дьокутааппыт Руслан Еремеевич Федотов оҥорбута. Онон киниэхэ махталым улахан”, — диир Игорь Петрович.

Бу күннэргэ тутуутун барытын ситэрэн-хоторон, ахсынньы 6 күнүгэр хотон үөрүүлээхтик аһыллыаҕа.

Ааптар: Наталья Бубякина, Амма улууһа.

4
0
comments powered by HyperComments