Ил Дархан бирииһигэр ат сүүрдүүтэ бэс ыйын 27 күнүгэр буолар. Амма улууһуттан Василий Тимофеев бэрэссэдээтэллээх Строд аатынан хаһаайыстыбаттан Мейзи Кинг уонна Анатолий Баишев дириэктэрдээх «Давидофф» ХЭТ Свидетель Барс кытталлар. Ыраас хааннаах боруода сылгылара улуус чиэһин көмүскүөхтэрэ.
Россия күнүгэр СӨ Ил Дарханын бирииһигэр үгэс буолбут ат сүүрдүүтүгэр сүүмэрдиир күрэх үс түһүмэҕинэн араарыллан буолла. Күрэхтэр түмүктэринэн уон бастыҥ сүүрүк аттар ааттаннылар.
“1600 м уһуҥҥа саха сиригэр төрөөбүт үс саастаах ыраас хааннаах аттарга күрэх аммалар киэн туттар киһибит, Үлэ Геройа, хорсун буойун, учуутал, бэйэтин кэмигэр киэҥник сураҕырбыт, үрүҥ илгэни үрүлүппүт «Юбилейнай» хомсомуол-ыччат ферматын наставнига, ыанньыксыт П.И. Яковлев аатын үйэтитии тэрээһиннэрин чэрчитинэн Амма улууһун дьаһалтата, «Амма» ТХПК, «Амма түмсүү» 100 тыһ. анал бириистэригэр буолла. Бу күрэххэ «Бөтүҥ» хаһаайыстыба Леди Левинсон диэн ата үһүс кэллэ. Ону тэҥэ эмиэ 1600 м уһуннаах дистанцияҕа Саха сиригэр төрөөбүт түөрт саастаах уонна онтон үөһэ саастаах ыраас хааннаах аттарга 9 ат кыттыбытыттан, Найт Шот диэн «Давидоф» ХЭТ ата бастакынан кэлэн, Мэҥэ Хаҥалас улууһа туруорбут Сэбиэскэй Сойуус Геройа Попов Федор Кузьмич аатыгар 100 тыһыынча солкуобайдаах анал бириис 50 тыһыынчалаах сертификатынан наҕараадаланна. Маны сэргэ 800 м сүүрдүүгэ икки саастаах ыраас хааннаах тыйдарга Строд аатынан хаһаайыстыба Франко диэн тыйа бастакы уонна Галилей диэн тыйа үһүс бириистээх миэстэлэри ыллылар. Уопсайынан бу сүүмэрдиир сүүрүүгэ аммалар ситиһиилээхтик кыттаннар. Ил Дархан бирииһигэр 10 талыллыбытыттан икки ат киирдэ. Ил Дархан бирииһигэр ат сүүрдүүтэ сэҥээрээччилэргэ олус күүтүүлээх буолар. Манна саамай бастыҥтан бастыҥнар киирсэллэр. Сүүрдүү Дьокуускай куоракка Үс-Хатыҥҥа, ат сүүрдүүтүгэр Саха сирин бастакы үтүөлээх тренерэ Иннокентий Саввич Свинобоев (Тыыннаахап) аатын сүгэр «Дьөһөгөй» ипподромугар эпидемиологическай балаһыанньанан көрөөччүтэ суох буолуо«, — диэн СӨ ат спордун Федерациятын президенэ, Ил Түмэн дьокутаата Руслан Федотов билиһиннэрдэ, суруйар “Амма олоҕо” хаһыат https://www.instagram.com/amma_olo5o/
