Амма улууһун Мунньаҕын депуттаттара бастакы сессияларыгар 10 тэрээһин боппуруоһу көрдүлэр. Бэрэссэдээтэлинэн Емельянова Прасковья Ивановнаны биир санаанан быыбардаатылар. Саамай саастаах депутат Иван Назаров салайан ыытта. Депутаттары Ил Түмэн депутата Руслан Федотов эҕэрдэлээтэ. 


Амма улууһун Мунньаҕын депутаттарыгар Руслан Федотов кыттыыны ылла. Кини Ил Түмэн Эҕэрдэ суругун туттарда. «Норуот итэҕэйэн талбыт дьоно буоларбыт быһыытынан, кинилэр накаастарын толорууга, баҕа санааларын олоххо киллэриигэ бииргэ үлэлиэхпит«, — диэн эттэ кини.

Сессияҕа кыттыыны ылбыт улуус баһылыга Николай Архипов Ил Дархан Айсен Николаев улуус олохтоохторугар анаан ыыппыт эҕэрдэ суругун ааҕан иһитиннэрдэ уонна депутаттарга туһаайан улуус сайдыытыгар дьаһалтаны кытта бииргэ үлэлииргэ ыҥырда.

Депутаттар бу сессияларыгар бастакы быһаарыыларын ылыннылар. Ол курдук мандатнай хамыыһыйаны, бастайааннай хамыыһыйаны, кинилэр бэрэссэдээтэллэрин, президиуму, бэрэссэдээтэл солбуйааччытын быыбардаатылар, Мунньах регламенын уонна структуратын бигэргэттилэр.

Биэс сылга салайыахтаах Сэбиэт бэрэссэдээтэлин аһаҕас куоластааһынынан быыбардаатылар. Улуус баһылыгын солбуйааччытынан 15 сыл устата үлэлээбит, салайар үлэҕэ опыттаах Емельянова Прасковья Ивановна биир санаанан быыбарданна.

Депутаттарга дастабырыанньалары уонна түөскэ анньыллар значоктары улуус баһылыга Николай Архипов туттарда. Бэйэлэрин баҕа санааларын, үтүө сүбэлэрин 2008-сылтан 2018 сылга диэри Сэбиэт бэрэссэдээтэлинэн үлэлээбит, депутатскай корпуһу салайбыт Алексей Карманов, уопсастыбаннай Сэбиэт бэрэссэдээтэлэ Евстафий Аргунов уонна баһылык солбуйааччылара, управлениелар начальниктара тириэртилэр.

Сессия туһунан сиһилии «Амма олоҕо» хаһыакка ааҕаарыҥ.

Ааптар: Наталья Бубякина

0
0
comments powered by HyperComments