Аммаҕа сэрии бэтэрээнэ 90 сааһын бэлиэтээтэ

Амма улууһун Абаҕа нэһилиэгэр соҕотох сэрии бэтэрээнэ Дмитрий Дмитриевич Адамов 90 сааһын дьонун-сэргэтин ортотугар дьоһуннаахтык бэлиэтээтэ.


Абаҕа олохтооҕо Дмитрий Адамов Аҕа дойду улуу сэриитин кэнниттэн дойдутугар кэлэн үлэ үөһүгэр түспүтэ. Ытык киһи төһө да 90-с хаарын санныгар ууллардар, билигин да сүһүөҕүн үрдүгэр сылдьар. Таһырдьа салгыҥҥа тахсан сибиэһэй салгын сиир, араадьыйанан сонуннары истэн сэргэхсийэр.

Дмитрий Дмитриевыһы улуус баһылыгын бастакы солбуйааччы Иннокентий Климентов, улуус бэтэрээннэрин Сэбиэтин бэрэссэдээтэлэ Александра Шестакова, улуус социальнай көмүскэл управлениетын начальнига Саргылана Константинова, Абаҕа нэһилиэгин баһылыга Макар Тимофеев эҕэрдэлээтилэр. Бэтэрээҥҥэ дойду Президэнэ Владимир Путин, республика бэтэрээннэрин Сэбиэтин, улуус баһылыгын Николай Архипов эҕэрдэ суруктара туттарылыннылар.

Дмитрий Дмитриевич улуус уонна нэһилиэк бочуоттаах олохтооҕо, сааһын тухары тыа хаһаайыстыбатын эйгэтигэр таһаарыылаахтык үлэлээбитэ.

0
0