Аммаҕа тупсаҕай тутуулаах дьиэҕэ киирии малааһына олохтоохтору үөртэ. Сүрүн бэдэрээччит “Тутуу Дирекцията” нэһилиэк саамай баараҕай дьиэтин кылгас кэм иһигэр хаачыстыбалаахтык тутан үлэҕэ киллэрдэ. Дьиэ ис-тас бараанынан ураты, Аммаҕа сонун.
Дьиэ таһыгар массыына тохтууругар анаан киэҥ-куоҥ парковкалааҕын таһынан оҕо оонньуур былаһааккалаах. Тутуллубут да сирэ талба — нэһилиэк килбэйэр киинэ. Саҥа дьиэ күлүүһүн тутар дьолун 38 киһи биллэ. Ол иһигэр, хаарбах туруктаах дьиэттэн көһөрүллүбүттэр, тулаайахтар уонна ипотеканан атыыласпыттар.
Кэнники сылларга хаарбах туруктаах дьиэлэртэн көһөрүү бырагыраамата Амма улууһугар тутуу балысханнык барарыгар улахан далаһа уурда. Бүгүн бу бырагыраама иккис түһүмэҕэ саҕаланаары турар. Билиҥҥи туругунан, улуус үрдүнэн докумуоннаммытынан хаарбах туруктаах дьиэ уопсай иэнэ 56 тыһ. кв. миэтэрэҕэ тэҥнэһэр. Онон, өссө да элбэх саҥа дьиэ дьэндэйиэҕэ диэн эрэл элбэх. Ити өттүгэр улуус салалтата ыкса үлэлэһэр суон соруктаах, бэлэм. Ону Экэниэмикэ миниистирин эбээһинэһин толорооччу Майя Данилова бигэргэттэ: “Хаарбах туруктаах дьиэлэртэн көһөрүү бырагырааматынан Амма улууһа улахан үлэлэри ыытан кэллэ. Бу бырагыраама бастакы түһүмэҕэ түмүктэннэ. Күн бүгүн иккиһэ үлэлиэхтээх. Онно анаан федеральнай бүддьүөттэн, барыллаан, 26 млрд. солкуобай тыырылынна. Өрөспүүбүлүкэ өттүттэн эмиэ үбүлээһин көрүллүөҕэ”.
