Амма5а хаарбах туруктаах дьиэлэр олохтоохторо тустаах бырагырамма иккис түһүмэҕэ саҕаланарын күүтэллэр. Саамай кутталлаах туруктаах  − Амма бөһүөлэгэр Мира уулуссаҕа турар 1-кы нүөмэрдээх дьиэ.


Амма улууһугар «2013-2017 сс. хаарбах туруктаах дьиэлэртэн гражданнары көһөрүү» бырагыраамма иккис түһүмэҕэ саҕаланарын кэтэһээччилэр урукку сыллардааҕар өссө элбээтилэр. Маҥнайгы түһүмэх бэрт ситиһиилээхтик түмүктэммитэ. Хас да аварийнай туруктаах элбэх кыбартыыралаах дьиэ хаһаайыттара саҥа дьиэҕэ киирэр дьолу билбиттэрэ.

1968 сыллаахха тутуллубут Мира уулусса 1-кы нүөмэрдээх элбэх кыбартыыралаах дьиэ сууллар туруктаах турар. Дьиэ түстэр-түһэн, истиэнэлэрэ саккырыы тураллар. Олохтоохтор бары элбэх оҕолоох, кырдьаҕас дьон күннэтэ оһол эрэ тахсыбатын диэн кутталга олороллор.

— Кыһынын наһаа кутталлаах, тоҕо диэтэр тыһыгырыы турар. Дьиэбит күн аайы 1 сантимиэтирэ түһэн иһэр. Куттала диэн турбата кыайбакка тэһэ баран хааллаҕына кыра оҕолор эчэйиэхтэрин сөп. Ол хаһан баҕарар буолар кутталлаах,– диэн олохтоох Александра Таджибаева сонньуйар.

Билигин  олохтоохтор баҕа санаалара биир – бырагырамма иккис түһүмэҕэ саҕаланна да, бастакы уочаракка кинилэр дьиэлэрин киллэрэллэрэ буоллар диэн. Олохтоох дьаһалта баһылыга Михаил Артемьев  боппуруоска маннык хоруйдуур:

 Амма нэһилиэгигэр аварийнай туруктааҕынан биллэриллибит 26 дьиэ баар, ол иһигэр Мира 1 нүөмэрдээх  дьиэ.  Биһиги бу дьиэни хонтуруолга ылан турабыт. Олохтоохтору кытта куруук сибээстэһэ сылдьабыт, туох эмит уларыйыы тахсар түгэнигэр кинилэр биллэрдэхтэринэ быһа гыммакка тахсан көрөбүт-истэбит. Аварийнай уонна хаарбах туруктаах дьиэлэртэн гражданнары көһөрүү бырагырамма 2 түһүмэҕэ саҕаланнаҕына бастакы уочаракка киллэрэргэ үлэлэһиэхпит диэн олохтоохтору эрэннэрэн олоробут.  

Улуус үрдүнэн  бу кэлэр сылга салҕанаары турар бырагырааммаҕа 8 нэһилиэктэн 54 элбэх кыбартыыралаах хаарбах туруктаах дьиэ киириэхтээх. Кинилэр уопсай иэннэрэ 16770 кв.м тэҥнэһэр. Бу урукку сыллардааҕар 5 төгүл элбэх көрдөрүү.

 Ааптар: Тамара Сметанина, «Амма олоҕо» хаһыат

0
0
comments powered by HyperComments