Өрөспүүбүлүкэ парламеныгар алтыс ыҥырыылаах Судаарыстыбаннай Мунньах (Ил Түмэн) бастакы пленарнай мунньаҕын үлэтин саҕалаата.

Балаҕан ыйын 25-26 күннэригэр ыытыллар бастакы пленарнай мунньах бэбиэскэтигэр 17 боппуруоһу көрүөхтэрэ. Мунньах арыллыытыгар талыллыбыт Ил Дархан Айсен Николаев тыл эттэ.

Мунньах үлэтигэр өрөспүүбүлүкэ судаарыстыбаннай сүбэһитэ Михаил Николаев, бырабыыталыстыба бэрэссэдээтэлин эбээһинэһин толорооччу Владимир Солодов, СӨ Конституционнай суутун бэрэссэдээтэлэ Александр Ким уонна ыҥырыылаахтар кытталлар.

Бастакы мунньаҕы парламент спикерин талыахха диэри КПРФ баартыйаттан 14 №-дээх Алданнааҕы  биир мандааттаах быыбардыыр уокурукка талыллыбыт Роза Солнышкина  арыйар уонна ыытар.

Бастаан парламентарийдар алтыс ыҥырыылаах Судаарыстыбаннай Мунньах (Ил Түмэн) бастакы мунньаҕын сэкирэтэрийээтин талыахтара.

Маны сэргэ мандаатынай хамыыһыйаны уонна мандаатынай хамыыһыйа бэрэссэдээтэлин талыахтара. Салгыы алтыс ыҥырыылаах Саха Өрөспүүбүлүкэтин норуодунай дьокутааттарын боломуочуйаларын дьиҥ таһымнаахтык бигэргэтиэхтэрэ.

Бастакы мунньах бэбиэскэтигэр каадыр боппуруоһун көрүөхтэрэ. Дуоһунастаах сирэйдэри талыах иннинэ, парламентарийдар счетнай хамыыһыйаны талыахтара.

Салгыы каадыр боппуруоһун көрүөхтэрэ. Ол курдук, парламентарийдар Судаарыстыбаннай Мунньах (Ил Түмэн) Бэрэссэдээтэлин,  Судаарыстыбаннай Мунньах (Ил Түмэн) Бэрэссэдээтэлин бастакы солбуйааччыны уонна икки вице-спикери талыыга киириэхтэрэ. Ону сэргэ норуот дьокутааттара Арассыыйа Федерациятын Федеральнай Мунньаҕын Федерация Сэбиэтигэр Саха сирин парламенын бэрэстэбиитэлин кандидатуратын быһаарыахтара.

Дьокутааттар сис кэмитиэттэри уонна хамыыһыйалары тэрийии туһунан боппуруоһу дьүүллэһиэхтэрэ.

Сарсын, балаҕан ыйын 26 күнүгэр, пленарнай мунньах иккис күнүгэр алтыс ыҥырыылаах Судаарыстыбаннай Мунньах (Ил Түмэн) сис кэмитиэттэрин уонна хамыыһыйаларын бэрэссэдээтэллэрин талыахтара уонна балар састааптарын туһунан боппуруоһу көрүөхтэрэ.

Бу күн парламентарийдар маннык сокуон барылларын дьүүллэһиэхтэрэ: “Саха Өрөспүүбүлүкэтигэр тыыл бэтэрээннэрин уонна үлэ бэтэрээнэрин социальнай өйөбүл туһунан” Саха Өрөспүүбүлүкэтин Сокуонугар уларытыылары киллэрэр туһунан” (Саха Өрөспүүбүлүкэтин Ил Дарханын э.т. көҕүлээбит сокуона, бастакы ааҕыыта); “1945 сыл балаҕан ыйын 3 күнүгэр сокуоннай саастарын сиппэтэх гражданнары социальнай өйөбүл миэрэлэрин туһунан” (Саха Өрөспүүбүлүкэтин Ил Дарханын сокуону көҕүлээһинэ, иккис ааҕыыта).

0
0
comments powered by HyperComments