29 Кулун тутар 29.03
  • -11°
  • $ 92,26
  • 99,71

Алтынньы 26 күнэ. Оскуола бибилэтиэкэлэрин аан дойдутааҕы күнэ - Бикипиэдьийэ

09:01, 26 октября 2020
Текст:
Читайте нас на
Яндекс Новости
ЯДВ

Бу күн Австрия өрөспүүбүлүкэ күнүн бэлиэтиир. СӨ норуот хаһаайыстыбатын үтүөлээх үлэһитэ, «Анаабыр алмаастара» урукку салайааччыта, хайа инженера Матвей Евсеев бүгүн 56 сааһын бэлиэтиир. Оскуола бибилэтиэкэлэрин күнүн ЮНЕСКО көҕүлээһининэн аан дойдуга алтынньы төрдүс бэнидиэнньигэр бэлиэтииллэр. 


Алтынньы 26 диэн Григориан халандаарыгар сыл 300-с күнэ (ордук хонуктаах сылга 301-c күнэ). Сыл бүтүө 65 күн баар.

Бэлиэ күннэр:

  • Интерсекс дьон (ол аата генетика эбэтэр биология атын төрүөтүнэн толору эр киһи эбэтэр дьахтар буолбатах, ыккардынан дьон) кыһалҕаларын санатар күн. Аан бастаан бу кыһалҕаҕа педиатр быраастар болҕомто уурбуттара.
  •  Австрия — Өрөспүүбүлүкэ күнэ. Бу күн 1955 сыллаахха омук сэриилэрэ дойдуттан тахсааттарын кытта дойду түмэнэ Нейтралитет туһунан сокуон ылыммыт.
  •  Науру — Ангам күнэ (Өрөгөй күнэ). Бу күн 1932 сыллаахха Науру төрүт олохтоохторун ахсаана 1500 буолбут (1919 сыллаахха салалта наассыйа өлбөтүн-сүппэтин туһугар науру омуга бачча буолуохтааххыт диэн сорук туруорбут эбит). Билигин бу омук ахсаана 9 тыһыынчаттан тахса.
  • Алтынньы төрдүс бэнидиэнньигэр ЮНЕСКО көҕүлээһининэн аан дойдуга Оскуола бибилэтиэкэлэрин күнэ бэлиэтэнэр.

Түбэлтэлэр:

  • 1581 — Ермак сэриитэ Кучум хаан сэриитин үлтүрүппүт уонна Сибиир ханлыгын киин куоратын Искэри сэриилээн ылбыт.
  • 1597 — Кэриэйэ уонна Дьоппуон ыккардыларынааҕы Имджин сэриитин кэмигэр аатырбыт Мёнъян кыргыһыыта буолбут. 13 эрэ ааллаах кэриэй адмирала Ли Сунсин 300 ааллаах дьоппуон флотун кыайбыт. Бу иннинээҕи кыргыһыыга кэриэй флота барыта кэриэтэ урусхалламмыт, аҕыйах аал ордубут. Ол эрээри кинилэри утары синньигэс Мёнъян силбэһиитигэр киирбит дьоппуон ааллара байҕал таһыма түһүүтүгэр-тахсыытыгар түбэһэн үгүстэрэ бэйэ-бэйэлэрин кытары харсыспыттар уонна суорба таастарга анньыллыбыттар. Хамсыыр кыаҕа суох үмүөрүспүт ааллары кэриэйдэр тэргэнинэн ытыалаан тимирдибиттэр.
  • 1790 — Дьокуускай куорат дьаралыга бигэргэммит. Ол саҕана быһаарыыта маннык эбит: «Үрүҥ көмүс хонууга кииһи туппут хотой».
  • 1860 — Италия холбоһуутун кэмигэр Джузеппе Гарибальди «Тыһыынчатын» эспэдииссийэтэ түмүктэммит. Сицилия хоруоллугун урусхалаабыт Гарибальди Сардиния хоруолун Виктор Эммануилы көрсүбүт уонна сэриилээн ылбыт сирин-дойдутун киниэхэ анаан билиһиннэрбит. Эһиилигэр Виктор Эммануил Италия хоруола диэн титул ылбыт.
  • 1886 — Амма улууһун Абаҕатыгар оскуола аһыллыбыт. Билигин Абаҕа оскуолата аныгылыы дуальнай үөрэҕи биэрэр агрооскуола быһыытынан биллэр.
  • 1978 — Доруобуйа аан дойдутааҕы тэрилтэтэ (ВОЗ, WHO) уоспа вируһа айылҕаҕа симэлийбитин туһунан биллэрбит. Бу вакцинация биир улахан кыайыыта буолар.
  • 1985 — Австралия бырабыыталыстыбата аатырбыт Улуру хайаны аборигеннарга төннөрбүт. Австралия ортотугар истиэп курдук нэлэмэн сиргэ турар 348 м үрдүктээх Улуру таас хайа олохтоох омуктар үҥэр ытык сирдэрэ буолар.
  • 1992 — Саха Өрөспүүбүлүкэтин Үрдүкү Сэбиэтин Президиумун «СӨ Судаарыстыбаннай былааҕын стаатута» диэн 1203-ХII нүөмэрдээх уурааҕа тахсыбыт. Бу уураах 2004 сыллаахха от ыйын 15 тохтотуллубут.
  • 2007 — СӨ бэрэсидьиэнэ Вячеслав Штыров уонна Росатом баһылыга Сергей Кириенко Саха сиригэр устар аатамнай теплоэлектростанциялары (ПАТЭС) тутар туһунан сөбүлэҥҥэ илии баттаабыттар.

Төрөөбүттэр:

  • 1964 — Матвей Евсеев — «Арктик Капитал» генеральнай дириэктэрэ, 1997-2016 сылларга «Анаабыр алмаастара» хампаанньа генеральнай дириэктэрэ, СӨ Народнай хаһаайыстыбатын үтүөлээх үлэһитэ, СунтаарАнаабыр уонна Хаҥалас улуустарын Ытык киһитэ.
  • 1980 — Николай Рыкунов — Арассыыйа суруйааччыларын Сойууһун чилиэнэ (2015с.), литэрэтиирэ кириитигэ, прозаик, суруналыыс, тылбаасчыт.

Өлбүттэр:

  • 1979 — Пак Чон Хи — 1962-1979 сылларга Соҕуруу Кэриэйэ бэрэсидьиэнэ. Кини диктатордыы салайыытынан Соҕуруу Кэриэйэ балысхан сайдыыны ситиспитэ, быстар дьадаҥы олохтон төлө көппүтэ. Пак Чон Хи кэмигэр олоххо киирбит бырайыактар: суоллары тутуу, POSCO диэн баараҕай тимир уһаарар собуот, биэс сыллаах былааннар, «Саҥа дэриэбинэ» бырайыак.
Следите за самым важным и интересным в Telegram-канале и WhatsApp-группе ЯСИА