АЛРОСА. Үүттээх ынахпытын атыылаабат инибит (БЛОГЕР)

0
77

Бэҕэһээ «АЛРОСА» хампаанньатыгар саҥа президенинэн Сергей Иванов диэн 37-лээх киһи ананыан сөп диэни иһиттибит диэн edersaas.ru суруйдулар.


Эдэр киһи МГИМО-ну бүтэрбит, хамнастаах үлэҕэ Газпромҥа, Газпромбааҥҥа, СОГАЗ тэрилтэҕэ үлэлээбит. Былырыын аҕай Сбербанк вице-президенинэн анаммыт. Кини аҕата Сергей Иванов урут Кремль Администрациятын дьаһайбыта. Путин чугас киһитэ.  Билигин РФПИ (Российский фонд прямых инвестиций) наблюдательнай сэбиэтин салайар. Онтон РФПИ 2016 сыллаахха АЛРОСА атыыламмыт акциятын (10.9 %) аҥарын атыыласпыта.

Өскөтө Кремль иһигэр «силовиктар» уонна «либераллар» илин-кэлин түсүһэллэр диэн үһү-домох теориянан салайтардахха, эдэр Иванов аата эмискэ күөрэйбитэ мээнэҕэ буолбатах. Кининин аҕатынан сылыктаатахха, «силовиктар» бэрэстэбиитэллэрэ буолуон сөп. Оттон уурайааччы Андрей Жарков «либерал» Алексей Кудриҥҥа чугас этэ диэн суруйаллар. Уопсайынан либераллар кэнники кэмҥэ мөлтөөтүлэр. Саатар былырыын экономика миниистирэ Улюкаев (эмиэ “либерал”) бэрик ылла диэн тутуллубута.

Жаркову тоҕо уураттылар? “Коммерсант» хаһыат суруйарынан, Жарков Росимуществоны кытта «Алмазный мир» АО (алмаастар таможняларын тэрилтэтэ диэххэ сөп) акциятын атыылааһынын кытта сөбүлэспэтэх, аны 2017 сыллааҕы хампаанньа бүддьүөтүн быспыттарын аһаҕастык утарбыт. Сураҕа хампаанньаны дьаһайар вице-премьер Юрий Трутневтыын эмиэ тыл-тылга киирсибэтэх диэн суруйаллар. Баҕар, АЛРОСА акциятын батарары эмиэ сөбүлээбэтэҕэ буолуо.

Хампаанньа акциятын ылыан, атыылыан баҕалаахтааҕар быдан элбэхтэр быһылаах. Forbes суруйарынан, хампаанньаны кытта бииргэ үлэлииргэ ыкса интэриэстээх Лев Леваев баар. Кини 2016 с. $1 млрд баайдаммыт уонна,  бэл, Forbes испииһэгэр киирбит. Леваев үс тэрилтэтэ («Руиза»,  LLD Diamonds уонна ООО «Туналгы») алмааһы АЛРОСАттан быһа ылаллар. Аны Сулейман Керимов диэн баай баар. 2011 сыллаахха бырабыыталыстыба АЛРОСА акциятын барытын атыылаары тииспиттэригэр, бу киһи ону ыларга интэриэстээҕин биллэрбитэ.  Ол эрээри, атыыга хампаанньа 16% эрэ тахсыбыта. (Егор Борисов Путинныын быһа кэпсэтэн ити ситиһиллибитэ) Керимов ол иһин атыыга оччолорго кыттыспатаҕа уонна бэйэтин АЛРОСА пакетын (1%) атыылаабыта.

Билиҥҥи туругунан, кинилэр АЛРОСА-ны кыайан дьаһайбаттар. Онон бу дьон, хампаанньа салайсаары, акциябытыгар дураһыйыахтарын сөп. Forbes өссө маннык cуруйбут: «Атын акционердар суорҕаны бэйэтигэр тардыалаһаары гыннахтарына, Саха сирин бэрэстэбиитэллэрэ туораһайдаһаллар. Егор Борисов: «Барытын хонтуруоллуу олоробут» — диэн бэлиэтээбит».

Олунньуга РФ бырабыыталыстыбатын саҥа уурааҕа тахсыбыта. ВТБ, «Совкомфлот», АЛРОСА, о.д.а. тэрилтэлэр акцияларын  (барыта 477 АХ, 298 ФГУП) атыылаан  икки сыл устата 5,6 млрд. үп киллэрэргэ былааннаабыттара. Докумуоҥҥа «АЛРОСА» хампаанньа судаарыстыбаҕа баар акциятын атыылаан, 29%+1 эрэ диэри хаалларарга диэн ыйыллыбыт. Билигин федеральнай киин 33%-наах, өрөспүүбүлүкэ – 25,0002%, муниципалитеттар — 8%. Уураахха консолидированнай атыылааһын диэн суруллубут. Ол аата, биһиги эрэ атыылыыр буоллахпытына, федеральнай пакет атыыланар кыахтаах. Ол эрээри, ханнык да сокуоҥҥа итинник «консолидированнай атыылааһын» диэн суох.

Ил Дархан Егор Борисов даҕаны, Ил Түмэн дьокутааттара даҕаны Саха сирин акциятын атыылыыры күүскэ утараллар. Судаарыстыба бас билиитигэр сылдьар акцияларбыт (25%+1) сокуонан көмүскэллээхтэр. Ону атыылыырга туспа сокуон тахсыахтаах. Оттон муниципалитет акцияларын улуус дьокутааттара бэйэлэрэ быһаараллар. Конституциянан да ыллахха, олохтоох салайыныы бэйэтэ туспа былаас, судаарыстыба онно орооһоро, ыга үктүүрэ сатаммат.

Билигин сир аннынан күүстээх үлэ, кэпсэтиилэр, суоһурҕаныылар бара тураллара саарбаҕа суох. Манна биири өйдүөххэ наада, үүттээх ынахпытын (АЛРОСА акциятын) билигин атыылаан баһаам элбэх харчыны ылабыт дуу, биитэр салгыы иитэммит үүппүтүнэн бэйэбит уонна сиэннэрбит өссө да арыылаан сиибит дуу…  Үүттээх ынаҕын өйдөөх хаһаайын атыылаабат. Онон дьокутааттарбыт (хайа да таһымҥа) сомоҕолоһуохтарын наада. Өлбүт ынаҕым үүттээх да этэ диэбэт курдук.

0
0

Хоруй суох

Хоруйдаа