Алексей Колодезников “Якутия” авиахмаппаанньа кэлэктиибигэр саҥа салайааччыны билиһиннэрдэ

Бүгүн Саха сирин бырабыыталыстыбатын бэрэссэдээтэлин бастакы солбуйааччы Алексей Колодезников “Якутия” авиахампаанньа кэлэктиибигэр саҥа салайааччыны билиһиннэрдэ.

Дириэктэрдэр сэбиэттэрин быһаарыытынан хампаанньа генеральнай дириэктэринэн Владимир Горбунов ананна.

“Саха сиригэр Владимир Павлович – туора киһи буолбатах. 16 сыл Саха сиригэр олорбута, Нерюнгритааҕы этэрээккэ үлэлээбитэ. “Авианово”, “Добролет” бөдөҥ хампаанньалар бырайыактарын саҕалаабыта. Биһиги тустаах соруктары толорор кыахтаах киһини буллубут дии саныыбын”, — диэтэ Колодезников.

Бастакы вице-премьер “Якутия” үлэтигэр үгүс боппуруос баарын бэлиэтээтэ. Көтүүгэ куттал суох буолуутун уонна сөптөөх усулуобуйаны хааччыйыы сүрүн соругунан буоларын санатта.

“Бары итэҕэстэри туоратыахха. Кэмиэрчэскэй сулууспа уонна инженернэй-техническэй састаап тиһиктээх үлэлэрин хааччыйыахха. Көтүү тардыллыыта олох суох буолуохтаах. “Якутия” – бу стратегическай хампаанньа буоларын өйдүөхтээххит”, — диэтэ салгыы Колодезников.

Кини хампаанньа үлэтин чопчу былаанын оҥорорго, үп боппуруостарын быһаарарга эттэ. Ону сэргэ Уһук Илиҥҥэ авиатиэйиилэргэ көрүллэр субсидиялары ылыыга сорук туруорда. Маны сэргэ аҕыйах сылынан дойдуга МС-21 сөмөлүөт оҥоһуллан тахсарыгар бэлэм буолар наадатын ыйда.

This post was published on 19.10.2018 17:40 17:40