Илин эҥэр, киин, хоту улуустарга быйыл курааннаан, аһыҥа туран өрөспүүбүлүкэ уонча улууһугар от үүнүүтэ мөлтөх. Бу туһунан Ил Дархан уонна бырабыыталыстыба пресс-сулууспатыгар сигэнэн, СИА иһитиннэрэр.
От ыйын 16 күнүгэр бырабыыталыстыба бастакы вице-премьера Алексей Колодезников Нам улууһугар тахса сылдьан Аппааны, Граф биэрэгин Тумачча, Ойоҕос, Туора Күөл, Эбэ ходуһаларыгар сырытта.
Тыа хаһаайыстыбатын миниистирэ Александр Атласов намнар быйыл 423 тыһ. тонна оту бэлэмниэхтээхтэрин туһунан кэпсээтэ. Барыллаан суоттааһын түмүгүнэн 48 тыһ. тонна от тиийбэт кутталлаах. Кини өрөспүүбүлүкэҕэ 15 тыһ. тонна былырыыҥҥы от саппааһа баарын, 14 тыһ. тонна сенаж, 22 тыһ. тонна оту мобильнай биригээдэ көмөтүнэн бэлэмнэниэхтээҕин туһунан эттэ.
«Быйыл сүөһү аһын бэлэмнииргэ ыарахаттардаах сыл. Өрөспүүбүлүкэ үрдүнэн 212 тыһ сүөһү, сылгы кыстыырыгар барыта 471 тыһ. тонна от бэлэмнэниэхтээх. Ол эрэн Илин эҥэр, киин, хоту улуустарга быйыл курааннаан, былаан 90% ол эбээтэр 423 тыһ. тонна от бэлэмнэнэр кэриҥнээх. Тыа хаһаайыстыбатын министиэристибэтэ мобильнай биригээдэлэри тэрийэргэ үлэлэһэ сылдьар. 170 биригээдэ тэрийэр былааннаахпыт, маныаха бүддьүөт саппаас чааһыттан 26 млн солкуобай көрүллүө», — диэн Алексей Колодезников эттэ.
Александр Атласов мобильнай биригээдэлэр өрөспүүбүлүкэ 11 улууһугар үлэлиэхтэрэ диэтэ.
Фермер Евдокия Иванова оттуур ходуһата быйыл саас ууга турбута да от үүммэтэҕин кэпсээтэ. «Бу сиргэ биһиги отучча сыл оттоон кэллибит. Сылын аайы араас күчүмэҕэйдэри көрсөбүт. Санаабытын түһэрбэппит, биир салаа оту хаалларбакка оттуу сатыахпыт», — диэн кини этиннэ.
От төһө да мөлтөҕүн иһин, Нам сүөһү көрөөччүлэрэ төбөлөрүн аҕыйаппат санаалаахтар.
