Мунньаҕы СӨ Олоҥхо ассоциациятын президенэ, СӨ үөрэҕин миниистирэ Ф.В. Габышева, Олоҥхо 10 сыллаах үлэтин бэлэмнээн ыытыыга СӨ национальнай тэрийэр кэмитиэтин бэрэссэдээтэлэ, СӨ Ил Түмэнин бэрэссэдээтэлэ А.Н. Жирков, Олоҥхо ассоциациятын Мэҥэ Хаҥалас улууһунааҕы филиалын салайааччы Ф.В. Шишигина, М.К.Аммосов аатынан Хотугулуу-Илиҥҥи федеральнай университет институтун директора, Олоҥхо ассоциациятын вице-президиэнэ В.Н. Иванов, Мэҥэ Хаҥалас МО баһылыга Н.П.Старостин иилээн – саҕалаан ыыттылар. Отчуокка Мэҥэ Хаҥаластан, Намтан, Уус Алдантан, Чурапчыттан, Хаҥаластан, Горнайтан, Томпоттон, Дьокуускай куораттан барыта 85 киһи кыттыыны ылла.
СӨ Олоҥхо ассоциациятын президенэ, СӨ үөрэҕин миниистирэ Феодосия Габышева ассоциация 10 сыллаах үлэтин отчуоттаата. Салгыы ассоциация улуустааҕы филиалларын бэрэссэдээтэллэрэ 10 сыллаах үлэлэрин сырдаттылар.
Мунньах кыттыылаахтара санааларын үллэһиннилэр, Ол курдук, М.К.Аммосов аатынан Хотугулуу-Илиҥҥи федеральнай университет преподавателэ Галина Попова-Санаайа олоҥхону толорооччуларга, уһуйааччыларга улахан болҕомтону ууран, өрө тутуохха, олоҥхону истээччилэри иитэн таһаарыахха, ыччаттарга олоҥхо түмсүүлэрин тэрийиэххэ диэн этии киллэрдэ. М.К.Аммосов аатынан Хотугулуу-Илиҥҥи федеральнай университет учуонай сэбиэтин чилиэнэ, «Олоҥхо педагогиката» бырагыраама ааптара Екатерина Чехордуна олоҥхоһуттары иитэн таһаарыыга, сайыннарыыга уһуйаан иитиллээччилэрин сыһыаран үлэлиэххэ диэтэ.
Чурапчы улууһунааҕы филиал үлэһиттэрэр дьону олоҥхону истэргэ үөрэтиэххэ, олоҥхоһуттары тэрилтэлэринэн сырытыннаран олоҥхолотуохха, оччоҕо эрэ биһиги истээччини иитэн таһаарыахпыт диэн бэлиэтээтилэр. Олоҥхо ассоциациятын вице- президенэ В.Н.Иванов Ассоциация мунньахтара улуустарынан ыытыллаллара туһалааҕын ыйда, олоҥхоһуттарга куонкурустары тэрийиэҕиҥ диэн этии киллэрдэ. Олоҥхоһут Николай Баишев олоҥхоһуттарга ыһыах кэмигэр куонкурус ыытыллара сыыһа дии саныыбын. Тоҕо диэтэххэ, былыр олоҥхолоон күрэстэспэт этилэр, хас биирдии олоҥхону толорооччу бэйэтин куолаһынан толороро диэтэ.
Хаҥаластан улууһуттан Антонина Охлопкова инникитин үөрэх салаатын кытта биир кэлим бырагыраама оҥостон, кыра саастаах оҕолору, ыччаты олоҥхоҕо сыһыарыыга элбэх үлэ былааннанарын эттэ. Амма улууһун Бөтүҥ нэһилиэгин олохтооҕо Анисия Софронова олоҥхоһут оҕолору үөрэтэр анал уһуйааччылары иитиэххэ, оскуолаҕа эбии чаас көрөн, олоҥхону оҕолорго үөрэтиэххэ диэн этии киллэрдэ. М.К.Аммосов аатынан Хотугулуу- Илиҥҥи федеральнай университет үлэһитэ Варвара Обоюкова учуутала Гавриил Колесов сырдык кэриэһигэр анаан “Гавриил Колесов саха олоҥхотун үйэтитиигэ сүҥкэн кылаата”, “Сахалыы ырыа-тойук туһунан санаалар” икки дискэлээх хомуурунньук тахсыбытын сырдатта.
М.К.Аммосов аатынан Хотугулуу-Илиҥҥи федеральнай университет специалиһа Руслан Анисимов Үөһээ Бүлүүтээҕи филиал үлэтин кылгастык сырдатта уонна Мойтохонова салайааччылаах олоҥхо оскуолата аһыллыбытын, ситиһиилэрин туһунан билиһиннэрдэ.
Уопсай мунньаҕы түмүктүүрүгэр Олоҥхо 10 сыллаах үлэтин бэлэмнээн ыытыыга СӨ национальнай тэрийэр кэмитиэтин бэрэссэдээтэлэ, СӨ Ил Түмэнин бэрэссэдээтэлэ Александр Жирков инники өттүгэр тугу үлэлиирбитин сиһилии былаанныахха, төрүт култуурабытыгар тирэниэххэ, истээччи баар буоларын ситиһиэххэ, улуустарга Олоҥхо дьиэлэрэ баар буолуохтаахтар диэтэ. Олоҥхоҕо үөрэтэр уһуйааччыларга, учууталларга эбии чаас көрөн хамнастыыры Феодосия Габышеваҕа сорудахтаата, Феодосия Васильевна 2010 сылтан СӨ Олоҥхо ассоциациятын президенинэн таллыллыаҕыттан таһаарыылаахтык үлэлээбитин, өссө да үлэлиир кыахтааҕын бэлиэтээтэ. Онон мунньах кыттыылаахтара Габышева Феодосия Васильевнаны СӨ Олоҥхо ассоциациятын президенинэн хаттаан биир санаанан таллылар.
Бу күн олоҥхону сайыннарыыга бэйэлэрин сүҥкэн кылааттарын киллэрсибит дьоҥҥо СӨ Олоҥхо ассоциациятын махтал суруктарынан уонна ассоциация 2012-2014 сылларга ыыппыт тэрээһиннэрин сырдатар кинигэлэринэн биһирэннилэр. Ону тэҥэ СӨ Ил Түмэнин бэрэссэдээтэлэ А.Н.Жирков улуус делегацияларыгар өйдөбүнньүк бэлэхтэри туттартаата.
Лидия Харитонова
