Николай Соломов 1941 сыллаахха тохсунньу 29 күнүгэр Абый оройуонун Муҥурдаах нэһиэлэгэр күн сирин көрбүтэ. Кини олоҕун бэлиэ түһүмэхтэрэ, судаарыстыбаннай деятель быһыытынан киэҥник биллэн, үлэлээбит сыллара Саха сиригэр дьоһун суолталаах уонна тосту уларыйыылаах кэрдиис кэмҥэ түбэспитэ. Салайааччы быһыытынан бастакы хардыыта төрөөбүт Абый оройуонуттан саҕаламмыта. Кэскиллээх эдэр үлэһит комсомол оройуоннааҕы кэмитиэтигэр салаа сэбиэдиссэйинэн, онтон кэлин бастакы сэкирэтээринэн талыллыбыта. Николай Соломов ханна даҕаны үлэлээтэр – комсомолга, партийнай, хаһаайыстыбаннай уорганнарга, өрөспүүбүлүкэ ситэриилээх уонна сокуону таһаарар былааһыгар, ханнык да дуоһунаска олордор, хайа баҕарар боппуруоһу быһаарыыга судаарыстыбаннай соругу тэҥинэн киһиэхэ киһилии сыһыаны өрө тутара. Николай Иванович дьонун-сэргэтин иннигэр бэриниилээхтик үлэлээн, хас да төгүл депутат мандаатын итэҕэйбит биир дойдулаахтарын ытыктабылларын, билиниилэрин ылыан ылар.
Николай Соломов өрөспүүбүлүкэҕэ парламентаризм сайдыытыгар бэйэтин дьоһун кылаатын киллэрсибитэ. Кини салалтатынан үһүс ыҥырыылаах Ил Түмэн Саха Өрөспүүбүлүкэтин судаарыстыбаннаһын бөҕөргөтүү, Саха сиригэр олохтоох салайыныы оҥкулун оҥоруу, нолуок уонна бюджет политикатын тупсарыы, сир сокуоннарын сайыннарыы курдук боппуруостарга күүскэ ылсан үлэлээбитэ. Экономика оҥорон таһаарар хайысхаларын, промышленность, энергетика, тырааныспар, тыа хаһаайыстыбатын салааларын правовой өйөөһүн, өрөспүүбүлүкэ экономиката куттала суох буолуутун хааччыйыы бастакы суолталаммыттара. Бюджеты хаҥатар сүрүн салаа – алмаас хостуур промышленноска ураты хонтуруолга ылыллыбыта. Улахан болҕомто нефть, газ, чох уонна да атын сир баайын хостуур салааларга ууруллубута. Үһүс ыҥырыылаах Ил Түмэн алмааһы чочуйуу, нефть, газ промышленноһын, салгын тырааныспарын сайыннарыыга; тыа сирин нэһилиэнньэлээх пууннарыгар гаһы тардыыга, тыа сирин социальнай-экономическай сайдыытыгар; илин эҥэр улуустарын уунан хааччыйыыга уонна уу ситимин тардыыга, М.К. Аммосов аатынан Саха судаарыстыбаннай университетын, тыа хаһаайыстыбатын судаарыстыбаннай академиятын сайыннарыы тосхоллорун ылынан бигэргэппитэ.
Александр Жирков эҕэрдэ тылыгар Николай Соломов олоххо турууласпыт тускулларын бэриниилээхтик толорон, норуотун иннигэр ытык иэһин чиэстээхтик, үтүө суобастаахтык толорбутун бэлиэтээтэ. Ил Түмэн спикерэ Н.И.Соломов аата Саха сиригэр эрэ буолбакка, бүтүн дойду үрдүнэн буолбут үтүө уларыйыылары кытта ыкса ситимнээҕин эттэ. «Гражданин быһыытынан биир сүрүннээх суолу, халбаҥнаабат санааны тутуһан, федеративнай сыһыаннаһыылары тупсарыыга, сайыннарыыга дьоһун кылааккын киллэрсибитиҥ. Российскай Федерация Федеральнай Мунньаҕын Федерация Сэбиэтигэр өрөспүүбүлүкэбит интэриэһин итэҕэтиилээхтик көмүскээбитиҥ. Федерация Сэбиэтин Хотугу төрүт олохтоох аҕыйах ахсаннаах норуоттарын дьыалаларын кэмитиэтигэр эн көҕүлээһиҥҥинэн уонна туруорсуугунан бүтүн Россия Хотугу сирин сүрүн боппуруостара көтөҕүллэн быһаарыллыбыттара, онуоха тирэх буолар туһааннаах сокуоннар оҥоһуллубуттара», — диэтэ Александр Жирков.
Н.И.Соломов булгуруйбат күүстээх санаатын көмөтүнэн олох уустуктарын туораабытын бэлиэтээн туран, ытык киһиэхэ чөл туругу, уһун, дьоллоох олоҕу баҕарда.
