Александр Жирков Намҥа олорор новатор учууталы Василий Петрович Иванову 75 сааһынан эҕэрдэлээтэ

0
344

Ил Түмэн Бэрэссэдээтэлэ Александр Жирков балаҕан ыйын 15 күнүгэр Намҥа сырыытын кэмигэр Арассыыйа үтүөлээх учуутала, педагогическай наука кандидата Василий Петрович Иванову 75 сааһын бэлиэтиир дьоро күнүнэн итиитик-истиҥник эҕэрдэлээтэ.


Василий Петрович Иванов Герцен аатынан педагогическай институту бүтэрээт, 1971 сыллаахтан саҕалаан олоҕун Нам улууһун педагогическай училищетыгар анаабыта. Маҥнай лаборант, учуутал, онтон дириэктэри солбуйааччы, ол кэнниттэн уһуннук училище дириэктэринэн айымньылаахтык үлэлээбитэ.

Училище материальнай базатын тупсарыы, саҥа таас дьиэ, уопсай туһунан боппуруостары бастакынан көтөхпүт киһинэн Василий Петрович буолар. Москуба куоракка үөрэх үлэһиттэрин Бүтүн Сойуустааҕы съезтэригэр делегатынан бара сылдьан, ССРС Министрдэрин сэбиэтин бэрэссэдээтэлин солбуйааччы Александра Павловна Бирюковаҕа киирэн, Нам улууһун педагогическай училищета дьиэтэ-уота мөлтөөн, хас даҕаны дьиэнэн тарҕанан үөрэнэллэрин этэн, бастакынан училище саҥа дьиэтин туһунан тылы көтөхпүтэ”, — диэн спикер кылгастык ахтан аһарда. Ол кэнниттэн Василий Иванов этиитин Саха Өрөспүүбүлүкэтин бастакы президенэ Михаил Ефимович Николаев олоххо киллэрэн, Нам педучилищета саҥа таас дьиэлэммитэ, уопсайдаммыта.

Александр Жирков Василий Петрович новатор-педагог буолан, 80-с сыллардаахха училище үөрэтэр хайысхатын уларытыыга күүскэ үлэлэспитин бэлиэтээтэ. “Мин оччолорго манна кэлэ сырыттахпына кини Нам училищета “Технология уонна дизайн” хайысхатын ылыныахтаах”, — диэн Александр Николаевич кини этиитин ахтан ылла уонна ону ситиспитин бигэргэттэ. Билигин Нам улууһун педагогическай училищета Илья Винокуров аатынан технология уонна дизайн педагогическа колледжа буолан турар.

Итини таһынан Василий Петрович колледж аныгы кэмҥэ үрдүк таһымҥа тахсарыгар учуонай истиэпэннээх учууталлардаах буолуохтаах диэн боппуруоһу көтөхпүтэ. Билигин колледжка уонча педагог, маҥнай аспиранынан саҕалаан, учуонай истиэпэнин ылан, үлэлии сылдьаллар.

Василий Иванов 1971 сыллаахха эдэригэр, 30 сааһын туола илигинэ, кэргэнэ Валентина Семеновналыын Нам сиригэр кэлиэхтэриттэн үгүс сыл устата үрдүк таһаарыылаахтык үлэлээн-хамсаан, билигин даҕаны колледж салалтатыгар өрүү сүбэ-ама буолаллар.

Александр Жирков Василий Петрович төрөөбүт дойдутун санаан, Уус Алдан Өнөрүттэн төрүттээҕин, кинилэри, 7 оҕону, ийэлэрэ бэйэтэ иитэн, атахтарыгар туруортаабытын аҕынна. Үс бырааттыы Ивановтар Саха Өрөспүүбүлүкэтин үтүөлээх үлэһиттэрэ буолбуттара, онтон Василий Петрович 44 саастааҕар Арассыыйа үтүөлээх учууталын аатын ылбыта.

Ил Түмэн Бэрэссэдээтэлэ Александр Жирков Василий Петрович Иванову 75 сааһын туолбут дьоро күнүнэн итиитик-истиҥник эҕэрдэлээтэ, туох-баар үтүөнү, чэгиэн доруобуйаны, дьолу-соргуну баҕаран туран, Саха Өрөспүүбүлүкэтин Ил Түмэнин Бэрэссэдээтэлин Махтал суругун туттарда уонна кэргэнигэр Валентина Семеновнаҕа сибэкки дьөрбөтүн бэлэхтээтэ.

0
0
[the_ad_group id="742"]