Александр Жирков Кириэмилгэ Арассыыйа күнүгэр анаммыт тэрээһиннэргэ кытынна

0
18

Саха Өрөспүүбүлүкэтин Ил Түмэнин Бэрэссэдээтэлэ Александр Жирков бэс ыйын 12 күнүгэр РФ Бэрэсидьиэнэ Владимир Путин ыҥырыытынан Москваҕа Арассыыйа күнүгэр анаммыт тэрээһиннэргэ — Кириэмилгэ РФ Судаарыстыбаннай бириэмийэлэрин туттарыыга уонна официальнай көрсүһүүгэ сырытта.

Георгиевскай саалаҕа Владимир Путин, үгэс быһыытынан, наукаҕа уонна технологияҕа, литератураҕа уонна искусствоҕа, гуманитарнай эйгэҕэ ситиһиилэр иһин РФ Судаарыстыбаннай бириэмийэлэрин туттарда. 2017 сыл түмүгүнэн лауреаттар ортолоругар биллиилээх дирижер Юрий Темирканов, А.С.Пушкин аатынан ойуулуур-дьүһүннүүр ускуустубаҕа Судаарыстыбаннай мусуой бэрэсидьиэнэ Ирина Антонова, РНА Н.И.Вавилов аатынан уопсай генетика институтун эволюционнай генетикаҕа сэбиэдиссэйэ Евгений Рогачев, эндокринологияҕа Национальнай медицинскэй чинчийэр киин дириэктэрэ, Арассыыйа сүрүн эндокринолога Иван Дедов, Санкт-Петербурдааҕы балет академическай тыйаатырын уус-уран салайааччыта Борис Эйфман, Аан дойдутааҕы акыйаан мусуойун генеральнай дириэктэрэ Светлана Сивкова, «Кристаллография уонна фотоника” ФНЧК фотохимияҕа киинин учуонайдара Михаил Алфимов, Сергей Громов, Александр Чибисов бааллар.

Бу ааттаммыт дьонтон 96 саастаах Ирина Антонова А.С.Пушкин аатынан ойуулуур-дьүһүннүүр искусство судаарыстыбаннай мусуойун 52 сылын салайан, Арассыыйаҕа мусуой дьыалатын сайдыытыгар уһулуччулаах кылааты киллэрбитэ. Кини аан дойдутааҕы мусуойдар сүбэлэрин салалтатыгар (ИКОМ) үлэлиир кэмигэр аан дойдуга Мусуой күнэ бэлиэтэнэрин 1977 сыллаахха ситиспитэ. Ирина Александровна ааспыт үйэ 80-с сылларыгар Саха сиринээҕи М.Ф.Габышев аатынан ойуулуур-дьүһүннүүр ускуустуба мусуойугар куратор быһыытынан көмөлөспүтэ. 1984 сыллаахха А.С.Пушкин аатынан мусуойга эрэгийиэннэр быыстапкаларын тэрийбитигэр, Саха сирин мусуойуттан түөрт үлэни туруортарбыта.

Биллиилээх балетмейстер Борис Эйфман хореографияҕа аныгылыы, ураты хайысханы төрүттээбитэ, Эйфман аатынан Санкт-Петербурдааҕы академическай балет театрын төрүттээбитэ. Борис Эйфман балетын саха көрөөччүлэрэ аан бастаан 2008 сыллаахха Дьокуускайга «Стерх» классическай балет бэстибээлигэр билсибиттэрэ. Бу тыйаатыр солистара бэстибээлгэ кэлин хаста да кэлэн ыалдьыттаабыттара. Борис Эйфман 70 сааһын туолуутугар, 2016 сыл от ыйыгар, Ньурбаҕа хостоммут 214,65 караттаах бөдөҥ алмааска кини аата иҥэриллибитэ.

Судаарыстыбаннай бириэмийэни туттарыы кэнниттэн Владимир Путин Кириэмилгэ Ивановскай болуоссакка Арассыыйа күнүн бырааһынньыгар көрсүһүү оҥордо. Үөрүүлээх тэрээһиҥҥэ Арассыыйа Бырабыыталыстыбатын чилиэннэрэ, Судаарыстыбаннай Дуума дьокутааттара, Федерация Сэбиэтин сенатордара, суут уонна ситэриилээх былаас федеральнай уорганнарын салайааччылара, субъектар парламенарын спикердэрэ, конфессиялар, уопсастыбаннай холбоһуктар, дипломатическай посольстволар бэрэстэбиитэллэрэ, наука уонна ускуустуба диэйэтэллэрэ сырыттылар.

Көрсүһүү кэмигэр Ил Түмэн спикерэ Александр Жирков Судаарыстыбаннай Дуума үөрэххэ уонна наукаҕа Кэмитиэтин бэрэссэдээтэлэ Вячеслав Никоновы кытта көрсөн, «РФ үөрэх туһунан» федеральнай сокуоҥҥа уларытыыны киллэрэр туһунан» (Арассыыйа Федерациятын норуоттарын тылларыттан уонна Арассыыйа Федерациятын састаабыгар киирэр өрөспүүбүлүкэлэр судаарыстыбаннай тылларыттан төрөөбүт тылы үөрэтэр өттүнэн) федеральнай сокуон барылыгар Саха сирин парламенын тутуһар санаатын тириэртэ. Ол курдук, Саха Өрөспүүбүлүкэтигэр бу сокуон барылын тула аймалҕан тахсыбытын, ырытыы буола турарын, Ил Түмэн этиилэрин Судаарыстыбннай Дуумаҕа суруйан ыыппытын иһитиннэрдэ, Госдуума үөрэххэ уонна наукаҕа кэмитиэтин оробуочай бөлөҕөр Ил Түмэн дьокутааттарын киллэттэрэри туруоруста.

Маны сэргэ, Александр Жирков бөдөҥ судаарыстыбаннай диэйэтэли, Федерация Сэбиэтин бочуоттаах Бэрэссэдээтэлэ Егор Строевы, Крым парламенын спикерэ Владимир Константиновы кытта көрүстэ.

Ил Түмэн пресс-сулууспата

0

0
0
0
[the_ad_group id="742"]