29 Кулун тутар 29.03
  • -11°
  • $ 92,26
  • 99,71

Александр Жирков «Кэнчээри» ансаамбыл оҕолорун кытта көрүстэ

15:23, 13 сентября 2016
Текст:
Читайте нас на
Яндекс Новости
ЯДВ

Бу сайын Сочига «Доҕордоһуу» оҕо лааҕырыгар өрөспүүбүлүкэ Үөрэҕин министиэристибэтэ Саха сириттэн барыта 250 оҕо сынньалаҥын тэрийдэ. Олор истэригэр быйыл Россия Федерациятын үтүөлээх кэллэктиибин үрдүк аатын сүкпүт «Кэнчээри» оҕо норуодунай, образцовай ансаамбылын 40 иитиллээччитэ лааҕыр бүтэһик сезонугар баран кэллэ.


Ансаамбыл кыттыылаахтара бүгүн Дьокуускайга көтөн кэлээт, салайааччылара — Россия Федерациятын уонна Саха Өрөспүүбүлүкэтин үтүөлээх үлэһитэ Василий Парниковы кытта Ил Түмэн Бэрэссэдээтэлэ Александр Жирковтуун көрүстүлэр. Манна Уус Алдан улууһун үөрэҕин управлениятын начальнига Ирина Тарская, «Кэнчээри» ансаамбыл үҥкүү бөлөҕүн педагог-хореограба Ульяна Ноговицына, төрөппүттэр кытыннылар.

Ансаамбыл салайааччыта Василий Степанович лааҕыр Краснодарскай кыраай Лазаревскай оройуонугар тирэхтэнэн үлэлиирин, оҕолор биир саастыылахтарын кытта алтыһан, Хара муораҕа дуоһуйа сөтүөлээбиттэрин, сынньалаҥы сэргэ айар маастарыстыбаларын көрдөрөн, кэнсиэрдээн, биһирэтэн кэлбиттэрин туһунан кэпсээтэ.

Педагог-хореограф Ульяна Ноговицына «Кэнсиэртээҕи бырагыраамабытыгар саха омугун култууратын, төрүт үгэһин арыйар үҥкүүлэр киирбиттэрэ. Ыһыах, оһуохай, сээдьэ – барыта ахтыллан ааспыта. Биһиги оҕолорбут тутта-хапта сылдьалларыттан, саастыылаахтарын кытта түргэнник биир тылы булалларыттан, кыттар таҥаспыт-саппыт ураты да буолан тута харахха быраҕыллаллар», — диэн Ульяна Петровна эбэн биэрдэ.

Ил Түмэн спикерэ Александр Жирков 6-с кылааһы бүтэрбит сайыныгар Бүтүн Союзтааҕы пионердар лааҕырдарыгар «Орлëнокка» хайдах баран кэлбитин кэпсээтэ. «Оскуолаҕа үөрэнэр кэмҥитигэр бу саамай үчүгэй, умнуллубат түгэн. Дьылҕа тосхойуута диэххэ сөп. Ылбычча, баҕардыҥ эрэ бүтүн кэллэктиибинэн Сочи курдук дойдуга баран кэлбэккин. Бу кэмнэри олоххут устата олус истиҥник өйдүү-саныы сылдьыаххыт. Саха оҕото барытыгар дэгиттэр талааннаах, ис-иһиттэн күрэстэһэр дьоҕурдаах буолар. Билиҥҥи үйэҕэ ыччат үчүгэй өттүгэр тардыһара, бэйэтин эйгэтиттэн ордук, үрдүк буола сатыыра бэйэтигэр туһалаах. Саха сирин биир бастыҥ ансаамбылыгар дьарыктанаргыт, ыллыыргыт-туойаргыт эһиэхэ тирэх, күүс буолар», — диэн Ил Түмэн Бэрэссэдээтэлэ көрсүһүүгэ эттэ.

Манна даҕатан эттэххэ, быйыл саас, кулун тутар 30 күнүгэр, Суорун Омоллоон аатынан Опера уонна балет театрыгар «Кэнчээри» ансаамбыл «Россия үтүөлээх коллектива» үрдүк ааты ылбытын чиэстиир дьоро киэһэҕэ театр сценатыгар Александр Жирков итиитик-истиҥник эҕэрдэлээн турар. Ансаамбыл 40 иитиллээччитэ сайын Хара муора кытылыгар сынньаналларын ситиһиэхпит диэн эппитэ. Ол этиитэ олоххо киирэн, оҕолор сынньалаҥнарын үйэ-саас тухары өйдүү сылдьалларын курдук атаардылар. Ансаамбыл иитиллээччитэ, Мүрү 1 №-дээх орто оскуола 8 кылааһын үөрэнээччитэ Анжелика Сивцева «кэнчээрилэргэ» оҕо саас умнуллубат кэрэ сайынын бэлэхтээбитин иһин Александр Николаевичка махтанна.

Спикер балаҕан ыйын 27 күнүгэр Ил Түмэн дьиэтин иннигэр Василий Васильевич Никифоров-Күлүмнүүр пааматынньыгын арыллыытыгар «Кэнчээри» ансаамбылын саха интеллигенциятын түс-бас киһитин туһунан Иннокентий Сыроватскай тылларыгар уонна Василий Парников матыыбыгар суруллубут «Сүгүрүй, үс саха төрүөҕэ» ырыаны Дүпсүн, Найахы олохтоохторун кытта холбоон, хор быһыытынан ол күн мустубут дьоҥҥо-сэргэҕэ иһитиннэрэллэригэр этии киллэрдэ.

Уус Алдан улууһун үөрэҕин управлениетын начальнига Ирина Тарская үөрэх бары үлэһиттэрин ааттарыттан Александр Николаевичка көҕүлээһинин уонна өйөбүлүн иһин, оттон төрөппүттэргэ оҕо сайдарын туһугар кыһамньыларын иһин махтанна. Ансаамбыл айар үлэтин өйүүр, таҥастарын-саптарын тиктэриитин чааһыгар үбүнэн көмөлөһөр улуус баһылыгар Алексей Федотовка махтал тылларын эттилэр.

Россия уонна Саха Өрөспүүбүлүкэтин үтүөлээх үлэһитэ Василий Парников Ил Түмэн мунньахтыыр аччыгый саалатыгар буолбут көрсүһүү хас биирдии оҕо өйүгэр-санаатыгар өр кэмҥэ хаалыахтаах диэтэ. Парламент дьиэтигэр Александр Николаевичтыын маннык быһыылаах көрсүһүү 2007 сыллаахха Парижка норуоттар икки ардыларынааҕы фестивальга ансаамбыл ситиһиилээхтик кыттан кэлбитин кэннэ буолбутун өйдөттө. Ол фестивальга «кэнчээрилэр» академическай ырыаҕа гран-при ылбыттара, фольклорга бастаабыттара.

«Үүнэр 2017 сылга ансаамбыл тэриллибитэ 45 сылын бэлиэтиэхпит. Онон элбэх үлэ күүтэр», — диэн салайааччы инники былааннарыттан үллэһиннэ.

Көрсүһүү кэнниттэн Александр Николаевич оҕолорго пленарнай мунньах ыытыллар саалатын билиһиннэрдэ, тугун-ханныгын быһаарда. Итиэннэ балаҕан ыйын 27 күнүгэр Ил Түмэн иннигэр Василий Васильевич Никифоров-Күлүмнүүр пааматынньыга туруохтаах сирин көрдөрдө.

Следите за самым важным и интересным в Telegram-канале и WhatsApp-группе ЯСИА