Алтыс ыҥырыылаах Ил Түмэн бастакы пленарнай мунньаҕын кэмигэр Саха сирин парламенын урукку спикерэ Александр Жирков саҥа парламеҥҥа бу пуоска туруорунартан аккаастаммыт биричиинэтин эттэ.
“Саҥа парламеҥҥа спикер дуоһунаһыттан аккаастаныым балачча уустук эпэрээссийэни уонна уһуннук чөлүгэр түһэриниини ааһарбын кытта сибээстээх. Ыарыы биһигиттэн ыйыппат… Өйүм-санаам, ис күүһүм тиийиэҕэ, оттон уопсай туругум, баҕар, кыайыа суоҕа. Туруоруммут сыалбыттан туораабаппын, быыбардааччыларым итэҕэллэрин толордум, кыаҕым тиийэринэн дьон эрэлин салгыы толоруом. Бу быһаарыыны Айсен Сергеевиһы, дьиэ кэргэммин кытта бииргэ ылынным.”, — диэтэ алтыс ыҥырыылаах дьокутааттар иннилэригэр тыл этэригэр Александр Жирков.
Маныаха кинини алтыс ыҥырыылаах парламент спикерин солбуйааччынан таллахтарына, саҥа парламеҥҥа уонна дьоҥҥо-сэргэҕэ туһалыам этэ диэн эрэнэрин биллэрдэ.
