Москваҕа Федерация Сэбиэтигэр Саха Өрөспүүбүлүкэтин Ил Түмэнин Бэрэссэдээтэлэ Александр Жирков Россия Федерациятын Федеральнай Мунньаҕын Федерация Сэбиэтин вице-спикерэ Галина Карелованы кытары дьыалабыай көрсүһүүлэрэ буолла. Өрүттэр Уһук Хотугу сиргэ суола-ииһэ суох аҕыйах ахсааннаах нэһилиэнньэлээх пууннарга медицинскэй көмөнү тэрийии уонна сири түҥэтии боппуруостарын тула кэпсэттилэр.
Чуолаан, «Россия Федерациятыгар гражданнар доруобуйаларын харыстааһын төрүттэрин туһунан» федеральнай сокуон 33 уонна 81 ыстатыйаларыгар уларытыылары киллэрии туһунан» федеральнай сокуон барылын дьүүллэстилэр. Бу тыа сиригэр эмп-томп тэрилтэлэрин сабары утарар сокуон барылын Ил Түмэн депутаттара уонна Федерация Сэбиэтин чилиэннэрэ кыттыһан киллэрбиттэрэ. Санатар буоллахха, бу көннөрүүлэргэ Уһук Хотугу сир оройуоннарыгар уонна онно тэҥнэниллибит сирдэргэ медицинскэй-санитарнай көмө станционардарга оҥоһуллуохтааҕа ыйыллар. Ол курдук, Саха сирин айылҕатын, климатын усулуобуйата уратытын, транспорт схемата уустугун, нэһилиэнньэ бытанан олоруутун учуоттуур. Бу уларытыы субвенция ааҕыллыытын методикатыгар Саха сиригэр көрүллэр коэффициени үрдэтиини эрэйэр.
Маныаха бүгүн Федерация Сэбиэтин социальнай политикаҕа кэмитиэтэ уонна федеративнай тутулга, регионнааҕы политикаҕа, олохтоох салайыныыга, Хоту сир дьыалаларыгар кэмитиэтэ «Уһук Хотугу сир оройуоннарыгар уонна онно тэҥнэниллибит сирдэргэ олорор нэһилиэнньэҕэ медицинскэй көмө тоҕоостоох буолуутун сокуонунан хааччыйыы уратыларын туһунан» парламент истиилэрин ыытар. Саха сириттэн Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Александр Корякин, СӨ доруобуйа харыстыбылыгар миниистирэ Михаил Охлопков кытталлар.
Маны сэргэ Ил Түмэн спикерэ көрсүһүүгэ «Уһук Илиҥҥи гектар туһунан» 119-ФЗ №-дээх федеральнай сокуоҥҥа уларытыылары киллэрэр туһунан боппуруоһу көтөхтө. Федерация Сэбиэтин Бэрэссэдээтэлэ Валентина Матвиенко сорудаҕынан Россия парламенын үрдүкү палататыгар туһааннаах сокуону дьүүллэһиигэ киирбит этиилэри ырытарга оробуочай бөлөх тэриллибитэ. Бу бөлөҕү Галина Карелова салайар. Александр Жирков Федерация Сэбиэтин оробуочай бөлөҕүн көрүүтүгэр «Уһук Илиҥҥи гектар» туһунан федеральнай сокуон дьүүллэһиитин кэмигэр өйөммөтөх эбэтэр сорҕото эрэ ылыллыбыт көннөрүүлэри киллэрэр. Чуолаан сир учаастагын бэриллиитин судургутуллубут бэрээдэгэр «ценз оседлости» киириэхтээҕин туһунан. Хара маҥнайгыттан бу сокуон оҥоһуллуута Уһук Илиҥҥи уокурукка нэһилиэнньэни тардыы, төттөрү көһөн барыытын тохтотуу биир көдьүүстээх механизмын быһыытынан көрүллүбүтэ. Ол эрээри ылыллыбыт саҥа сокуоҥҥа сир учаастагын бас билиигэ Уһук Илин субъектарыгар олорооччуларга эрэ бэриллиэхтээҕин нуормата олохтоммотох. Биэс сылынан бу гектары туһааннаах территорияларга бастайааннайдык көһөн кэлбит гражданнар бас билиэхтээхтэрин Саха сирэ туруорсар. Маны таһынан маһы соҕотуопкалааһыҥҥа көрүллэр сирдэр бэриллибэттэрин туһунан көннөрүүнү уонна да атын этиилэр дьүүллэһиллэллэр.
