Кулун тутар 5 күнүгэр Александр Оконешниковы өрөспүүбүлүкэ көҥүл тустууга сүүмэрдэммит хамаандатын сүрүн тренеринэн аныыр туһунан бирикээс бигэргэннэ. Бу туһунан «Спорт Якутии» иһитиннэрэр.
Саха сирин спорт көрүҥнэринэн сүрүн уонна старшай тренердэри бигэргэтэр хамыыһыйа кини кандидатуратын биир санаанан өйөөтө.
2019 сыл бэс ыйыгар Александр Оконешников өрөспүүбүлүкэ сүүмэрдэммит хамаандатын сүрүн тренерин эбээһинэһин толорооччу быһыытынан анаммыта. Бу кэм устата Саха сирин тустууктара Россия чөмпүйэнээтигэр боруонса, Ярыгин турнирыгар үрүҥ көмүс уонна боруонса, Европа чөмпүйэнээтигэр үрүҥ көмүс уонна боруонса, Уһук Илиҥҥи уокурук чөмпүйэнээтигэр түөрт кыһыл көмүс мэтээллэри ылары ситиспиттэрэ этиллэр.
Ону тэҥэ Ираҥҥа ыытыллыбыт «Кубок Тахти» норуоттар икки ардыларынааҕы турнирга, Дьокуускайга «Дмитрий Коркин» турнирыгар уонна да атын улахан күрэхтэһиилэргэ өрөспүүбүлүкэ бөҕөстөрө үчүгэй көрдөрүүлэммиттэрэ бэлиэтэнэр, диэн НВК «Саха» суруйар.
