«Биир ньыгыл Россия» регионнааҕы салаата бу күһүн буолаары турар Госдума быыбарыгар биир мандааттаах уокуруктан кандидаты туруорбат буолла. Ол оннугар регионнааҕы бөлөх үөскэтилиннэ. Ити туһунан Москваҕа ыытыллыбыт баартыйа съеһин кэнниттэн регионнааҕы салаа салайааччыта Александр Ноговицын эттэ.
«Биһиги баартыйа салалтатыгар биир мандааттаах уокуруктан кандидаттанары туруорсубуппут. Ол эрээри, бүтэһиктээх быһаарыы ылылынна, ол туолуохтаах», — диэтэ Александр Ноговицын.
Съезд быһаарыытынан биир мандааттаах 18 уокуруктан кандидаттары туруорбаттар. Ноговицын этэринэн, «Биир ньыгыл Россия» КПСС курдук буолуон баҕарбат, элбэх баартыйалаах систиэмэ хааларын өйүүр уонна ол туһугар үлэлиир.
«Атын баартыйалар биир мандааттаах 225 быыбардыыр уокуруктартан бэйэлэрин бэрэстэбиитэллэрин туруораллар. Дойдуга элбэх баартыйа көдьүүстээхтик үлэлиирин туһугар маннык дьаһал ылыллыбыт», — диир кини.
Онон, 8 уокурук сиэрдээхтэргэ, 3 – РФКП, 5- РЛДПТ, 2 – «Родина» бэриллибиттэр.
«Биһиги баартыйабыт салалтата эсердар кандидаттары киллэрэллэригэр кыаҕы биэрдэ. Ол эрээри, күөһү эрдэттэн өрүнэр сөбө суох, тоҕо диэтэххэ 12 баартыйа бэйэлэрин дьоннорун туруоруохтарын сөп. Бэйэ кандидатуратын киллэриигэ хаарчахтааһын суох», — диэтэ А.Ноговицын.
Саха сирин ньыгыллара регионнааҕы бөлөҕүнэн быыбарга кыттар кыахтаннылар. Бөлөҕү Егор Борисов баһылыыр. Аналитиктар этэллэринэн, федеральнай киин регион салайааччытыгар улахан итэҕэлиттэн маннык быһаарыы ылыллыбыт. Уһук Илиннээҕи испииһэккэ кини субъект соҕотох баһылыга. Испииһэккэ салгыы праймериз кыайыылаахтара Галина Данчикова, Юрий Куприянов, Чокуур Гаврильев, Владимир Аммосов уонна Сахамин Афанасьев бааллар.
