Үлэҕэ, социальнай сайдыыга миниистир Александр Дружинин тулаайахтар Бүлүүтээҕи интэрнээттэригэр үөскээбит быһыыны-майгыны тус хонтуруолугар ылла. -50 кыраадыс тымныыга оҕо дьиэтин сылааһа 18 кыраадыстан үрдээбэт.
Маннык уустук усулуобуйаҕа оҕолор олороллор, кинилэртэн баһыйар үгүстэрэ 4 саастарын туола иликтэр. Барыта 35 оҕо баар.
Интэрнээт дьиэлэрэ хаарбах, саахалланар кутталлаахтарын, хапытаалынай өрөмүөн барбатаҕа быданнаабытын дириэктэр этэр. Икки дьиэ кэргэн 2007 сыллаахха тутуллубут икки этээстээх дьиэҕэ олороллор. Дьиэ ититэр тиһигэ оҥоһуллубатаҕа ырааппыт, инньэ гынан нэһиилэ ититэ турар. 1987 сыллаахха тутуллубут биир эбийиэк эргэ туруктаах дьиэ туһунан билиниллибит.
«Бүлүү улууһун дьаһалтата хапытаалынай өрөмүөнү ыытарга көмөлөһөрүгэр көрдөһөбүт. Дьаһалта — үлэ министиэристибэтигэр, министиэристибэ — дьаһалтаҕа төттөрү-таары «тэбиллэ» сылдьабыт», — диэн интэрнээт дириэктэрэ Петр Иннокентьев этэр.
Үлэ, социальнай сайдыы миниистирэ Александр Дружинин бу боппуруоһу быһаарыах буолан эрэннэрдэ, ол эрээри дьиэ туругун иһин эппиэтинэһи улуус дьаһалтата сүгэрин кини этэр.
«Оҕо дьиэлэрэ бука бары муниципальнай тэрилтэлэр. Тэрийээччи — оройуон дьаһалтата. Онон ититии, уотунан хааччыйыы, о.д.а эппиэтинэһэ дьаһалтаҕа киирэр. Тулаайах уонна төрөппүт көрүүтэ-харайыыта суох хаалбыт оҕолорго анаммыт үлэни министиэристибэ икки хайысханан ыытар. Ол курдук, субвенцияны үллэрэбит уонна иитиллээччилэри кытта үлэҕэ методологическай базаны оҥоробут. Үп-харчы боппуруоһугар кыһалҕа суох. Баһылык Сергей Винокуров бу сытыы боппуруоһу быһаарыан наада. Мин тус бэйэм эмиэ ылсыам», — диир Александр Дружинин.
Миниистир эбэн эппитинэн, оҕо дьиэлэрин салайыыга уонна тутан олорууга реформа киллэрэр былааннаах. Дорожнай каарта оҥоһуллуоҕа, ол чэрчитинэн тулаайах оҕолор дьиэлэрэ бары кииннэнэн үлэ, социальнай сайдыы министиэристибэтигэр бэриллиэхтэрэ. Маны өрөспүүбүлүкэ бырабыыталыстыбата өйүөхтээх.
