«Охота и рыбалка в Якутии» бырагыраама эфиргэ тахсыбыта 11-с сыла. Биллэр телебиэрии Саха сирин эрэ олохтоохторун буолбакка, Россия уонна тас дойдулар көрөөччүлэрин куттарын тутар. Алтынньы 6 күнүгэр НВК «Саха» ханаалыгар «Река Токко. Охота на медведя» саҥа сезон биэриитэ көһүннэ.
«Охота и рыбалка в Якутии» биэрии ааптара уонна ыытааччыта, Саха сирин вице-премьерынан үлэлээбит, өрөспүүбүлүкэ сибээһин экс-миниистирэ Александр Борисов соһуччу олохтон күрэммитин кэннэ, саҥа ыытааччынан кини уола Илья Борисов буолла. Эдэр киһи аҕатын оҥорбут дьыалатын салгыырга эппиэтинэс ылынна.
Аҕалаах уол булка, балыкка элбэхтэ бииргэ сылдьаллара, манна айылҕа мындырдарыгар, кистэлэҥнэригэр үөрэммитэ.
«Река Токко. Охота на медведя» — бу Илья Борисов бастакы үлэтэ.
«Александр Ильич Борисов бырайыагын идеята бастакы бырагыраамата тахсыан төһө эмэ иннигэр саҕыллыбыта. Кини көхтөөх сынньалаҥ фаната, булдунан, балыктааһынынан үлүһүйэрэ. Кини куруук Саха сирин айылҕатын, кинини кытта алтыһыы философиятын дьон билиэн наһаа баҕарара. Айылҕаҕа харыстабыллаахтык сыһыаннаһыы, үгэстэри тутуһуу баар буолуохтааҕар үөрэтэрэ«, — диэн бырайыак продюсера Людмила Зорина эттэ.
Кини бэлиэтээбитинэн, саҥа биэриилэр тахсалларыгар көрөөччүлэр баҕа санаалара учуоттаммыт.
