Ааспыт сыл ахсынньытыгар өрөспүүбүлүкэ баһылыга Айсен Николаев тыа хаһаайыстыбатын сайыннарыыга ыйааҕа тахсыбыта. Регион тыа хаһаайыстыбатын миниистирэ Александр Атласов «ВГТРК Саха» быһа эфиригэр ыйаах үлэлиирин уонна түмүктэр баалларын эттэ.


 

Санатар эбит буоллахха, Саха сирин баһылыгын ыйааҕар биэс сорук уонна 24 тэрээһин киллэриллэ сылдьар. Сүөһү, көтөр тутар, оҕуруот аһын үүннэрэр эбийиэктэр, мелиорация, сиэмэни дэлэтии, сылгы иитиитэ, бородууксуйаны оҥорон таһаарыыны сайыннарыы, агропромышленнай оҥорон таһаарыыны өйүүр Фонданы тэрийии уонна да атыттар докумуоҥҥа киллэриллэллэр.

Миниистир Александр Атласов ыйаах биир сыл үлэлээбит кэмигэр биллэр түмүктэр баалларын эттэ. Ол курдук, федеральнай үбүлээһин эбилиннэ — холобур, былырыын 1,03 млрд солк. эбит буоллаҕына, быйыл 1,337 млрд солк. диэри улаатта. Маны сэргэ бородууксуйаны оҥорон таһаарыы индексэ үрдээбит. Тохсунньу — атырдьах ыйын көрдөрүү сыыппара 3,8% эбиллибит.

Миниистир СИА-ҕа анаан Айсен Николаев биир сыллааҕы үлэтигэр ситиһиилэргэ тохтоон кэпсээтэ. Холобур, сайылык күнүн биллэрии. Бу күн аан бастаан ыам ыйын 22 күнүгэр бэлиэтэммитэ. «Бу дьаһал чэрчитинэн, 16 хаһаайыстыбаҕа 50,8 мөл.солк. граннар олохтоммуттара, ол харчыга 1200 төбө киирэр 12 сайылык тутуллубута уонна 400 төбө эдэр сүөһү киирэр былаһааккалара оҥоһуллубуттара. Сүөһү иитэр хаһаайыстыбаларга, фермаларга өйөбүл оҥоһуллубута, 50 сылгы баазата 1 мөл.солк. суумалаах граннары ылбыттара. Маннык өйөбүл 25 бааһынай хаһаайыстыбаҕа уопсайа 140 мөл. солк. көмө оҥоһуллубута», — диэтэ Атласов.

Кулун тутар ыйтан «Сайын» диэн интернет-маҕаһыын арыллан, 10 хампаанньаны кытта бииргэ үлэлиир. Билигин 1300 көрүҥ олохтоох бородууксуйа батарылынна.

0
0
comments powered by HyperComments