Айылҕа министиэристибэтигэр Алдан оройуонугар сир аһын хомуйбут эр киһини туппуттарын уонна ыстырааптаабыттарын туһунан сураҕы сымыйа диэтилэр. Алданнааҕы лесничество СИА-ҕа биллэрбитинэн, сурах хаһыс да сылын куйаар ситиминэн күүлэйдиир.
Социальнай ситимнэргэ эрдэ Алдан оройуонугар сир аһын хомуйа сылдьар эр киһи тутуллубутун туһунан тарҕаммыта.
«Эр киһи көҥүлэ суох икки солуур отон хомуйбут, онон судаарыстыбаҕа 13 860 солк суумалаах хоромньу таһаарбыт. Билигин киниэхэ ыстыраап төлөттөрүөхтэрин сөп», – иһитиннэриигэ суруллар.
Салгыы 5 л элбэх сир аһын хомуйууга лицензия ирдэнэрин, онно госпошлината 350 солк буоларын, ханна отоннуу барар маршрут лиистээх уонна хомурдуостан вакцинациялааҕын туһунан ыспыраапкалаах буолуохтааҕа суруллубут.
«Сир аһын регион былааһа быһаарбыт болдьоҕун эрэ кэмигэр хомуллар», – дэниллибит сурахха.
Алданнааҕы лесничество ойууру харыстааһыҥҥа уонна көмүскээһиҥҥэ инженера Людмила Пилишкина СИА-ҕа маннык эттэ: «Биһиэхэ оннук суох, бу былырыын баар буолбут иһитиннэрии».
