“Симиир” тутар хампаанньа алтынньы 4 күнүгэр моҥкуруутунан биллэрилиннэ. Чайковскай уулуссаҕа кыһалҕалаах дьиэтин үлэҕэ киллэрбитин таһынан тутааччы Дьокуускайга Петр Алексеев уулуссатыгар үс ситэ тутуллубатах дьиэлээх. Эбийиэктэр бэлэм буолуулара намыһах, элбэх этээстээх дьиэлэр сыбаайалара эрэ түһэн турар. Дьиэни өлүүлэһэн тутууга кыттыспыт дьоҥҥо тутааччылар моҥкурууттууллара барыстаах дуо, суобаһа суох тутааччыларга бэриллибит харчыны төннөрөр кыахтаахтар дуо?

Эбийиэктэри тутууга хампаанньа 156 киһини кытыннарбыта. Бары дуогабардары “Респект” страховкалыыр хампаанньа” ХЭТ-кэ страховкалаппыттара. Страховка болдьоҕо 2018 сыл төрдүс кыбаарталыгар бүппүтэ, ити кэнниттэн өлүүлэһэн тутааччылар толуйууну ыларга суоттанар кыахтара суоҕа.

Ол эрээри, билигин СӨ Арбитражнай суутун уурааҕынан гражданнар укпут харчыларын төнүннэрэр кыахтаахтар. Итини төнүннэрэр туһуттан харчы ирдэбилин реестригэр сайабылыанньа биэриэхтээхтэр, ол кэнниттэн страховой хампаанньаҕа барыахтаахтар, диэн СӨ Судаарыстыбаннай тутууга уонна дьиэни-уоту кэтээн көрүүгэ управлениетын салайааччы Наталья Чусовская кэпсээтэ.

Эрдэ “Симиир “ХЭТ дириэктэригэр холуобунай дьыала тэриллибитин туһунан иһитиннэрбиттэрэ. Салалта өттүттэн суобаһа суох буолуу түмүгэр моҥкурууттааһын страховойа суох түгэнинэн буолар куттала баар. Быһаарыыны страховщик бэйэтэ ылынар. Интэриниэккэ “Респект” СК” ХЭТ төлүүртэн аккаастанарын туһунан иһитиннэриилэр тахсааччылар.

Ол эрээри Саха сиригэр “Северная строительная компания” өлүүлэһэн тутааччылара “Ринко” хампаанньаттан страховканы ылбыттарын туһунан сурах эмиэ баар.

Страховой толуйуу ханнык да илимиитинэн хаарчахтаммт. СӨ Судаарыстыбаннай тутууга уонна дьиэни-уоту кэтээн көрүүгэ управлениетын салайааччыта саныырынан, тутааччы тутууну түмүктүүрүгэр кыаҕа уонна үбэ суох буоллаҕына, моҥкурууттааһын – өлүүлэһэн тутааччылар бырааптарын көмүскээһиҥҥэ сөптөөх суол.

Ситэ тутуллубатах эбийиэктэри атын тутааччыга биэриэхтэрин биитэр гражданнар ЖСК тэрийиэхтэрин эбэтэр бүддьүөт үбүн суотугар тутуохтарын сөп.

0
0
comments powered by HyperComments