Ньурба улууһун Акана нэһилиэгэр Саха Өрөспүүбүлүкэтин судаарыстыбаннаһын күнүн чэрчитинэн өй уонна үлэ күрэҕин ыыттылар. Уопсайа сэттэлии киһилээх түөрт хамаанда сэттэ сорудаҕы толордо.
Ньурба Аканатыгар «Чөл олох аргыстара — бигэ турук, булугас өй, көхтөөх үлэ» хамаанданнан күрэххэ нэһилиэк 28 ыччата кытынна. Бастаан Октябрьскай уулусса 1/2 дьиэтигэр олорор Жирковтарга хотон маһын суордулар, оттон оскуолаҕа тиийэн биирдии бэйэлэрэ 30-та скакалканан ойдулар. Салгыы Октябрьскай уулусса 26 нүөмэрдээх дьиэтигэр Григорьева Х.Н. мас хайыттылар, сааһылаатылар. Кулуупка кроссворд таайдылар, ол кэннэ ветучаастакка кэлэн өс хоһоону ситэрэн суруйан биэрдилэр. Советскай уулусса 18 нүөмэрдээх дьиэтигэр тиийэн суоттаан суотабай телефон номерын таайан хаһаайыныгар эрийдилэр. Түмүккэ Марха өттүгэр турар киирии бэлиэҕэ хаартыскаҕа түстүлэр. Сорудахтары барытын эт атахтарынан сүүрэ сылдьан бириэмэҕэ толордулар.
Оонньуу усулуобуйатынан, кыттааччы 100 солкуобайы уопсай хааһынаҕа угар, ону бастаабыт хамаанда ылар диэн этэ. Оонньуу түмүгүнэн кыайыылаах үрдүк аатын 4-с хамаанда кыттааччылара: Мигалкин Ньургун, Васильев Михаил, Жирков Егор, Гуляева Иванна, Симонова Күннэй, Жиркова Евдокия, Давыдова Андреяна эрэллээхтик бастаан сүрүн бирииһи 2800 солк. ыллылар.
Ааптар: Агафья Иванова
