Оскуола үөрэнээччилэрин «Айылҕаны кэтээн көрүү» өрөспүүбүлүкэтээҕи куонкурустара аны сыл ахсын тэриллиэҕэ.
Куонкуруһу Арассыыйа географическай уопсастыбата, Гидрометкиин, ХИФУ уонна «Айылҕаны кэтээн көрүү күннүгүн» ааптардара, кэргэннии Герасимовтар өйөбүллэринэн, Саха Өрөспүүбүлүкэтин Үөрэҕин министиэристибэтэ итиэннэ Экология, айылҕаны туһаныы уонна ойуур хаһаайыстыбатын министиэристибэтэ тэрийэллэр. Куонкурус айылҕаны күннэтэ кэтээн көрүү нөҥүө оҕолорго «Тулалыыр эйгэ», «География» предметтэригэр интэриэһи күүһүрдэр, кинилэр тулалыыр эйгэлэрин кэтээн көрө, болҕомтолоох буола, айылҕа көстүүлэрин ситимнээн билгэлии үөрэнэллэригэр иитэр сыаллаах-соруктаах оҥоһуллар.
Манна уопсай үөрэхтээһин орто оскуолаларын уонна эбии үөрэхтээһин тэрилтэлэрин үөрэнээччилэрэ сааһыттан, хаһыс кылааска үөрэнэллэриттэн тутулуга суох, ким баҕалаах сайаапка түһэрэн, кыттыахтарын сөп. Онуоха быйылгы сыллаах «Айылҕаны кэтээн көрүү күннүгүн» күннэтэ толорон иһэр ирдэнэр.
Кыайыылаахтар маннык номинацияларынан быһаарыллаллар:
—— «Айылҕаны кэтээн көрүү күннүгүн систиэмэлээхтик толоруу». Үлэ киэбэ: Тохсунньу 1 күнүттэн ахсынньы 31 күнүгэр диэри толоруллубут күннүк куоппуйата.
—— «Кыыллар — күнү-дьылы билгэлээччилэр». Үлэ киэбэ: Тиэмэни арыйан, быһааран суруйуу, билгэлээһин көрүҥнэрэ, бэйэ түмүгэ.
—— «Үүнээйилэр — күнү-дьылы билгэлээччилэр». Үлэ киэбэ: Тиэмэни арыйан, быһааран суруйуу, билгэлээһин көрүҥнэрэ, бэйэ түмүгэ.
—— «Айылҕа көстүүлэрэ күнү-дьылы билгэлээһиҥҥэ». Үлэ киэбэ: Тиэмэни арыйан, быһааран суруйуу, билгэлээһин көрүҥнэрэ, бэйэ түмүгэ.
—— «Биһиги улууспут, нэһилиэкпит билгэһиттэрэ» чинчийэр үлэ. Үлэ киэбэ: Күнү-дьылы билгэлээччилэр олохторун-дьаһахтарын, үлэлэрин туһунан сырдатыы.
—— «Айылҕаны кэтээн көрүүгэ бэйэ оҥорбут тэриллэрин, прибордарын туһаныы». Үлэ киэбэ: прибордары хайдах туттары ойуулаан суруйуу, түмүк оҥоруу.
Үлэлэр презентационнай көрүҥүнэн Сүрүннээччи (Координатор) электроннай аадырыһыгар 2019 сыл тохсунньу 10 күнүгэр диэри ыытыллаллар: oikos_sakha@mail.ru Ыйыллыбыт болдьохтон хойутаабыт үлэлэр көрүллүбэттэр.
Куонкурус балаһыанньатын Экология, айылҕаны туһаныы уонна ойуур хаһаайыстыбатын министиэристибэтин саайтыгар билсиҥ: https://minpriroda.sakha.gov.ru/ekoprosveschenie
Раиса Сибирякова, «Саха сирэ» edersaas.ru
This post was published on 16.08.2018 17:42 17:42