Ахсынньы 4 күнүгэр Ил Дархан “Мицуи”, “Марубени” корпорациялар салалталарын, Япония тас дьыалаларга миниистирин солбуйааччы Абэ Тосикону, Японияҕа Арассыыйа боломуочуйалаах посолун Михаил Галузины кытта көрүстэ.
“Мицуи” вице-бэрэсидьиэнэ тойон Сатоси Танаканы кытта Саха сирин инфраструктураҕа аналлаах бырайыактарын боппуруостарын дьүүллэстилэр, ону тэҥэ “Умный город” IT-бырайыагы, Өлүөнэ эбэни туоратар муостаны уонна Арктика оройуоннарыгар тыал күүһүнэн үлэлиир тэриллэри туруорууну дьүүллэстилэр.
“Марубени” корпорация толорооччу дириэктэрэ тойон Эйдзи Окаданы кытта кэпсэтии Саха сиригэр тутулла турар бөдөҥ эбийиэктэри медицинскэй тэрилинэн хааччыйыыны, ону тэҥэ Саха сирин сиригэр-уотугар мотуор уматыгын оҥорон таһаарыы эйгэтигэр бырайыактары олоххо киллэриини кэпсэттилэр.
Айсен Николаев Япония тас дойдуларга дьыалаларын миниистирин солбуйааччы хотун Абэ Тосикону уонна Арассыыйа посола Михаил Галузины кытта түһэрсиллиэхтээх сөбүлэһиини дьүүллэстилэр, чуолаан, Саха сирэ уонна Хоккайдо префектуратын икки ардыларыгар эргиэҥҥэ-экэниэмикэҕэ, научнай-тэхиньичэскэй уонна гуманитарнай бииргэ үлэлээһиҥҥэ. Үөрэх уонна наука, култуура уонна успуор эйгэлэригэр гуманитарнай бырайыактары олоххо киллэрии бииргэ үлэлээһиҥҥэ дьоһун суолталаах буолуоҕа.
Бүгүн Япония парламеныгар Саха сирин уонна Япония Үһүс холбоһуктаах инвестиционнай сэминээрэ ыытыллыаҕа. Тыа хаһаайыстыбатын, тутуу уонна үрдүк технологиялар эйгэлэригэр бырайыактары олоххо киллэриигэ туһуламмыт кэккэ көрсүһүүлэр буолуохтара.
СИА.
