Быйыл ойуур баһаара былырыыҥҥытааҕар 30% элбээбитин үрдүнэн умуруоруу үлэтэ тупсубут диэн, Айсен Николаев бэҕэһээ Томпо улууһугар түөрт улахан ойуур баһаарын умулуннарыы үлэтин кытары билсии кэннэ эттэ. Бу туһунан Ил Дархан уонна Бырабыыталыстыба пресс-сулууспата иһитиннэрэр.


Ил Дархан Кириэс-Халдьаайы нэһилиэгин аттыгар баар баһаардары көрдө. Балар нэһилиэккэ суоһуур кутталлаахтара. «Авиалесоохрана» тэрилтэ Дьокуускайдааҕы, Амур уобалаһынааҕы парашютист-десантниктара, «Якутлесресурс» уонна олохтоох дьон көмөлөрүнэн бэҕэһээ икки уот умуруорулунна.

«Билигин балаһыанньа тубуста, уот умулунна диэххэ сөп. Кириэс-Халдьаайы, Сайдыы нэһилиэнньэ аттынааҕы уоттар бохсулуннулар», — диэтэ баһылык.

Ол эрэн бөртөлүөтүнэн көтүү чугас эргин уот көрдүгэннэрэ баарын көрдөрбүт. Ол аата нэһилиэктэргэ куттал син биир баар, диир Ил Дархан.

Томпоҕо сырыы түмүгүнэн Айсен Николаев ыксаллаах быһыы-майгы хамыһыйатын кытары мунньахха быйыл өрөспүүбүлүкэҕэ 1300 ойуур баһаара бэлиэтэммитин, онтон 94%-на кураанах этиҥтэн үөскээбитин эттэ.

Мунньах түмүгүнэн Айсен Николаев Томпо улууһугар уоту умулуннарыыны салгыы ыытары, баһаарга былдьаммыт уот линияларын саҥардарга, ыраах үөскүүр уот көрдүгэннэрин эрдэттэн бохсорго анаан ууну-хаары, бадарааны ортотунан сылдьар көлөнөн хааччыйары сорудахтаата.

 

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.