Айсен Николаев балаҕан ыйын 9 күнүгэр быыбардыыр учаастактарга кэлэн бэйэлэрин куоластарын биэрэн, Саха сирин инники кэскилин туһугар куоластаабыт өрөспүүбүлүкэ олохтоохторугар махтанна:
Саха Өрөспүүбүлүкэтин Ил Дарханын быыбарыгар миигин өйөөбүт уонна атын хандьыдааттарга куоластарын биэрбит дьоҥҥо ис сүрэхпиттэн махтанабын. Төһө да айылҕа уустук усулуобуйаны үөскэтэн, үгүс оройуоннарга хаар уонна ардах түспүтүн үрдүнэн, Саха сирин Киин быыбардыыр хамыыһыйатын барыллаан чахчытынан, өрөспүүбүлүкэ үрдүнэн быыбарга тахсыы 51,1 быр. тэҥнэстэ. Бу Саха сирин олохтоохторун гражданскай көхтөөх буолууларын, өрөспүүбүлүкэ олохтоохторо тус бэйэлэрэ Саха сирин дьылҕатыгар сабыдыаллыахтарын баҕаралларын туоһулуур.
Доҕоттор! Бу ыйдарга биһиги үгүһү оҥордубут: күүстээх халаан кэнниттэн кыстыкка бэлэмнэнэр кыахтанныбыт, өрөспүүбүлүкэҕэ хас эмэ сыл мунньуллубут тыын кыһалҕалары быһаарыыга федеральнай өйөбүлүнэн туһанныбыт. Бу ыйдарга мин Саха сирин үгүс оройуоннарыгар сырыттым, салалтаны уонна бары бөдөҥ бырамыысыланнай хампаанньалар салалталарын уонна кэлэктииптэрин кытта көрсүһүүлэри ыыттым. Куораттар уонна сэлиэнньэлэр тыһыынчанан олохтоохторун, урбаанньыттары, тыа хаһаайыстыбатын, үөрэхтээһин, доруобуйа харыстабылын, култуура үлэһиттэрин кытта көрүстүм. Барытыгар олоҕу тупсаҕай оҥоруохтарын баҕалаах, үлэлиири сатыыр, инникигэ бигэ эрэллээх дьону көрүстүм. Бу кэмҥэ араас хайысхаларга үгүс сонун идея уонна этиилэр киирдилэр. Эһигинниин бииргэ Саха сирин оройуоннарын уонна өрөспүүбүлүкэ бүттүүнүн стратегическай сайдыытын тумус тутуллар соруктарын чопчулаатытыбыт.
Бүгүн Саха сирэ сайдыы саҥа түһүмэҕэр турарын бары билэбит. Сөптөөхтүк таллыбыт уонна мантан өрөспүүбүлүкэбит кэлэр кэскилэ унна хас биирдиибит инники олоҕо тутулуктаах.
Буолан ааспыт быыбардар бэйэлэрин суолталарынан уонна киэҥ хабааннаахтарынан уратылаахтар: өрөспүүбүлүкэ Ил Дархана, өрөспүүбүлүкэтээҕи парламент саҥа састааба, киин куорат мээрэ уонна Дьокуускай куорат Дууматын дьокутааттара, 15 оройуон уонна 20 нэһилиэк баһылыга, оройуоннааҕы сэбиэт 22 уонна нэһилиэктэр бэрэстэбиитэллээх уорганнарын 7 дьокутаата талылыннылар. Бары уопсай сыалбытын ситиһиигэ – Саха сирэ аныгылыы көрүҥнээх, баай-талым олохтоох уонна чэчирии сайдарын туһугар түмсэн, бары бииргэ үлэлиэхпит диэн эрэнэбин. Биһиги кэлэр кэскилбитин көрүөхтээхпит, үтүө түмүктэри ситиһиигэ, хас биирдии Саха сирин олохтооҕо байылыаттык уонна дьоллоохтук олорорун туһугар үлэлиэхтээхпит.
Бу соруктары быһаарыы сомоҕолоһуута, Саха сирин олохтоохторун барыларын түмүүтэ суох кыаллыбат. Өйөбүлгүт иһин махтанабын! Саха сирэ, иннин диэки!
