Ил Дархан Айсен Николаев кэлэр үйэ оскуолата ньыманан тэриллибит «Школа 21» инновационнай үөрэх тэрилтэтигэр сырытта. Бу Сбербаан «Ecole 42» программированиеҕа французтар инновационнай оскуолаларыгар төрүттэммит үөрэхтээһиҥҥэ көҕүлээһинэ буолар.
Айсен Николаев «Школа 21» диретора Светлана Инфимовскаяны уонна үөрэтиигэ директор Дарья Чашкинаны кытта көрүстэ. Өрөспүүбүлүкэ баһылыга үөрэх хаамыытын кытта болҕойон билистэ, кластердарга, программирование оробуочай «станцияларыгар» сырытта, устудьуоннары кытта кэпсэттэ.
Дарья Чашкина иһитиннэрбитинэн, инновационнай оскуола Сбербаан көҕүлээһининэн 2018 сыл сэтинньитигэр үлэтин саҕалаабыт. Билигин манна 900 устудьуон үөрэнэр. Үөрэх тэрилтэтэ сылын аайы программирование эйгэтигэр 1000 исписэлииһи бэлэмнээн таһаарар былааннаах.
«Биһиги оскуолабытыгар үөрэнии босхо. Хайысхалара: «Алгоритмы», «Графика», «Мобильная разработка», «Компьютерная безопасность», «Робототехника», «Искусственный интеллект». Учууталлар, сыана туруоруута, расписание, лекциялар, тьютордар диэн суохтар. Онон устудьуоннар үөрэнэллэригэр тус эппиэтинэһи сүгэллэр. Оҕолорго сорудахтар бэриллэллэр, ону толоруохтаахтар, онно интернети туттуохтарын сөп, куурустары көрөллөр, учебниктары ааҕаллар. Оскуолаҕа киириигэ БКЭ түмүгэ да, үөрэҕин туһунан диплом да ирдэммэт. 18 саастаах киһи биһиги үөрэхпит тэрилтэтигэр талыыны ааһар бырааптаах», — диэн кини кэпсээтэ.
