Сэтинньи 6 күнүгэр Айсен Николаев Өрөспүүбүлүкэ инновационнай уонна цифровой сайдыытын торумнаата.

Кини Саха сиригэр IT-салаа сайдыытын кэскилин туһунан элбэхтик эппитэ. Билигин бу сыал уонна сорук чугастааҕы биэс сылга биир стратегическай докумуоҥҥа киирдэ.

2024 сылга Саха сирэ Арассыыйа субъектарын ортотугар цифровой сайдыыга баһылыыр миэстэни ылыахтаах. Технологическай саҥардыыны киллэрэр хампаанньалар ахсааннара икки төгүл элбиэхтээх, бу салааҕа инвестицияны тардыы сылга 1 млрд солк. тиийиэхтээх. Бу туһуттан өрөспүүбүлүкэҕэ Цифровой сайдыы киинэ, Үрдүк технологиялар пааркалара, инновация сайдыытын фондата тэриллиэхтээхтэр.

Цифровой технологиялар  экэниэмикэҕэ, ОДьКХ-ҕа, социальнай эйгэҕэ – үөрэхтээһиҥҥэ, доруобуйа харыстабылыгар, судаарыстыбаннай уонна муниципальнай салайыыга күүскэ киириэхтээхтэр. Судаарыстыбаны кытта электроннай сыһыаҥҥа 2024 сылга өрөспүүбүлүкэ 14-тэн үөһээ саастаах дьон бары хапсыахтаахтар.

“IT-салаа сайдыыта киһи хапытаалыгар, үрдүк таһымнаах идэтийбит каадырдарга тирэҕириэхтээх. Ол иһин бу эйгэҕэ үөрэхтээһиҥҥэ улахан болҕомто ууруллуохтаах.”, — диэн санаалаах Айсен Николаев.

Ыйаах программалааһыҥҥа, цифровой технологияларга өрөспүүбүлүкэ бары үөрэнээччилэрин үөрэтэргэ туһуланыаҕа.  Өрөспүүбүлүкэ улуустарыгар 17 IT-киин тэриллиэҕэ.

0
0
comments powered by HyperComments