Бу ый 26 күнүгэр Уһук Илиҥҥи федеральнай уокурук социальнай-экономическай сайдыытын туһунан ыйаахха дойду Президенэ Владимир Путин илии баттаата. Бу биһиги өрөспүүбүлүкэбитигэр олус күүтүллүбүт уонна наадалаах докумуон буоларын Ил Дархан Айсен Николаев эттэ.


Айсен Николаев эппитинэн, былырыын Судаарыстыбаннай сэбиэт иһинэн Саха сирэ Уһук Илин уонна Арктика сайдыытын министиэристибэтин кытта бииргэ үлэлээн, бырагыраама бэлэмнэнэн, балаҕан ыйынааҕы Уһук Илиҥҥи экономическай форум кэмигэр президент көрүүтүгэр киллэриллибит. «Ол түмүгүнэн президент сөптөөх уураахтары таһааран үлэ барда. Онтон бу бэс ыйын 26 күнүгэр өссө биир улахан суолталаах ыйаахха илии баттаата. Бу ыйаах чэрчитинэн үс ый иһигэр Россия бырабыыталыстыбата Уһук Илини сайыннарыы национальнай бырагырааматын бигэргэтиэхтээх. Бу көннөрү бигэргэтии эрэ буолбатах, үбүн-харчытын көрөн, бырагыраама кэлэр сылларга үлэлиэхтээх уонна дьон-сэргэ олоҕо тосту уларыйыахтаах», — диэтэ Ил Дархан.

Өрөспүүбүлүкэ баһылыга бэлиэтээбитинэн, докумуоҥҥа дьон олоҕун уһатыы, өлүүнү кыччатыы курдук киһи олоҕор быһаччы суолталаах пууннар киирбиттэр. Маны сэргэ доруобуйа харыстабыла, үөрэҕирии, култуура эйгэлэрин хаарбах туруктаах эбийиэктэрин өрөмүөннээһин туспа тутуллан суруллубут. Холобурга, Саха сиригэр 350-тан тахса эбийиэк хаттаан тутуллуохтаах.

Ыйаахха этиллэринэн, хаарбах дьиэлэр уопсай иэннэрэ үс аҥар төгүл кыччыахтаах. Ол аата «Хаарбах дьиэттэн дьону көһөрүү» бырагыраама салгыы үлэлиэхтээҕин Айсен Сергеевич ойуччу тутан бэлиэтээтэ.

«Магистральнай инфраструктура бырайыактарын өйөөһүн туһунан пуун баар. Манна саамай сүрүн эбийиэгинэн бырабыыталыстыба барылыгар киирэ сылдьар Өлүөнэ муостата буолар. Кэлэр ыйдарга бырагыраама бигэргэннэҕинэ, хайаан даҕаны муоста баар буолуо диэн эрэнэбит«, — диэтэ баһылык.

Кини түмүгэр: «Дойдубут президенэ Владимир Владимирович Путин чахчы Уһук Илини сайыннарар, дьонун-сэргэтин өйүүр былааннааҕын көрдөрөн, уонунан сылы инники көрөн, наадалаах докумуоннары таһаарарыттан мин олус үөрэбин. Кэнники сылларга туруоруммут былааннарбыт бу ыйаах таҕыстаҕына чахчы да олоххо киириэхтэрэ диэн эрэлбит өссө улаатта«, — диэтэ.

Сигэн:

0
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.