Күндү Саха сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан эһигини Саха Өрөспүүбүлүкэтин Судаарыстыбаннаһын күнүнэн эҕэрдэлиибин!
Лоп курдук 28 сыл анараа өттүгэр, 1990 сыл балаҕан ыйын 27 күнүгэр, Саха Өрөспүүбүлүкэтин Судаарыстыбаннай суверенитетын туһунан Декларация ылыныллан, регион сайдыытыгар саҥа тыыны укпута. Декларацияны ылыныы Саха сиригэр уустук 90-с сылларга дьоһун экономическай уонна социальнай боппуруостары бэйэ быһаарынарыгар кыаҕы биэрбитэ, уһун болдьохтоох стратегическай былааннары уонна тумус тутуллар соруктары олоххо киллэриигэ бөҕө тирэҕи уурбута.
Бүгүн Саха сирэ Арассыыйа толору бырааптаах, тэтимнээхтик сайдар субъега буолар. Биһиги өрөспүүбүлүкэбит сир баайынан, чөл айылҕатынан, үрдүк технологическай уонна научнай ситиһиилэринэн баай, ол эрээри сүрүн сыаннаһа – бу кэрэ, уһулуччу талааннаах, айар уонна үлэһит дьоно. Эһиги эрэ – Саха сирин олохтоохторо, бэйэҕит күннээҕи таһаарыылаах үлэҕитинэн өрөспүүбүлүкэбит уонна дойдубут бүттүүнүн сайдыытын түстүүгүт.
2022 сылга Саха Өрөспүүбүлүкэтэ 100 сыллаах үбүлүөйүн бэлиэтиэҕэ. Биһиги бэйэбит иннибитигэр бу кэрэ-бэлиэ даатаҕа үтүө уларыйыылардаах тиийэргэ соруктанабыт. Бүгүн биһиги куораттарбытын уонна сэлиэнньэлэрбитин бииргэ тупсарабыт, олорорго табыгастаах оҥоробут.
Элбэх омуктаах норуоппут үтүө үгэстэригэр тирэнэн, или-эйэни харыстаан, саҥа сыһыаннары олохтоон уонна сайдыы көдьүүстээх суолларын тобулан, биһиги иннибитигэр турар соруктары быһаарыахпыт, Саха сиригэр дьоһун инники кэскили хааччыйыахпыт.
Саха Өрөспүүбүлүкэтин Судаарыстыбаннаһын күнэ – бу Саха сирин олохтоохторун сомоҕолоһууларын күнэ! Бары бииргэ эрэ өрөспүүбүлүкэбитин чэчирии сайдар, күүстээх, олорорго тупсаҕай уонна табыгастаах оҥоруохпут!
Бука барыгытыгар чэгиэн доруобуйаны, дьолу-соргуну, этэҥҥэ буолууну, бары саҕалааһыннаргытыгар ситиһиилэри уонна сарсыҥҥы күҥҥэ эрэли баҕарабын! Эһиги алаһа дьиэҕитигэр өрүү үтүө санаа, ил уонна эйэ эҥэрдэстин! Бырааһынньыгынан, күндү Саха сирин олохтоохторо!
Айсен Николаев, Саха Өрөспүүбүлүкэтин Ил Дарханын эбээһинэһин быстах кэмҥэ толорооччу
