Бүгүн коронавируһу бохсор өрөспүүбүлүкэтээҕи суһал штаб мунньаҕар Ил Дархан Айсен Николаев өрөспүүбүлүкэ улуустарын наадалаах эмтэринэн толору хааччыйары сорудахтаата.
Ил Дархан нэһилиэктэргэ, улуус кииннэригэр сорох эмп суоҕун туһунан иһитиннэриилэри социальнай ситимнэринэн тутарын туһунан иһитиннэрдэ. Маныаха кини «Биир ньыгыл Арассыыйа» баартыйа көмөтүнэн улуустарга, нэһилиэктэргэ бэрэбиэркэ ыытары көҕүлээбитин, сорох улуустарга туһааннаах эмптэр чахчы суохтара нэһилиэнньэҕэ аймалҕаны үөскэтэрин эттэ.
Айсен Николаев суһал ыстаапка туһаайан өрөспүүбүлүкэ улуустарын наадалаах эмтэринэн толору хааччыйары сорудахтаата. Росздравнадзоры, эминэн хааччыйааччылары кытары ыкса үлэлэһэри эттэ.
Вице-премьер Ольга Балабкина Росздравнадзор эмп аптекаларга баарын-суоҕун күннэтэ бэрэбиэркэлии турарын, улуус баһылыктара «Сахафармация» тэрилтэни кытары күннэтэ үлэлэһэ олороллорун эттэ. Кини өрөспүүбүлүкэҕэ эбии эми киллэриини, хааччыйыыны быһаарыахтарын мэктиэлээтэ.
