29 Кулун тутар 29.03
  • -14°
  • $ 92,26
  • 99,71

Айсен Николаев: Олоҥхоҕо биһиги омукпут култуурунай куода

12:30, 25 ноября 2019
Текст:
Читайте нас на
Яндекс Новости
ЯДВ

Күндү Саха сирин олохтоохторо! Саха Өрөспүүбүлүкэтин салалтатын уонна тус бэйэм ааппыттан эһигини Олоҥхо күнүнэн итиитик-истиҥник эҕэрдэлиибин! 


Олоҥхо – бу биһиги өбүгэлэрбит орто дойду олоҕун туһунан дириҥ анаарыыларын, кинилэр тыйыс айылҕанан чиҥэтиллибит сыаннастарын уонна ыра санааларын, эйэлээх, уйгулаах олох түстэниитин бөлөһүөктүү көрөр тыыннаах айымньы. Олоҥхо – бу үрүйэ уутунуу ыраас, үйэлэри уҥуордаан кэлбит модун тыыннаах саха тылын төрдө-төрүтэ. Олоҥхоһут этэн-тыынан туойан бардаҕына, биһиги тылбыт ойуулуур-дьүһүннүүр күүһэ-күдэҕэ, эриэккэс эйгэтэ, эгэтэ-дэгэтэ, туойуллар толбоно араас өҥүнэн арылыйа оонньообутунан барар. 2005 сыл сэтинньи 25 күнэ биһиэхэ барыбытыгар дьоһун суолталаммыта – бу күн ЮНЕСКО Олоҥхону киһи аймах тылынан уонна өйүнэн айбыт култуурунай нэһилиэстибэтин үйэттэн үйэҕэ бэриллэр күндү баайа диэн аан дойду шедеврдэрин ахсааныгар киллэрбитэ. Бу улахан ситиһиибитин кэрэһилээн биһиги өрөспүүбүлүкэбитигэр Олоҥхо күнэ олохтоммута.

Бүгүн биһиги дьоммут-сэргэбит олоҥхо доллоһутар тойугун, байҕал уутун курдук бараммат баайын, аан айылҕа курдук сиэдэрэй тылын-өһүн кэрэхсииригэр ураты болҕомтобутун уурабыт. Олоҥхо тыйаатыра тэриллэн ситиһиилээхтик үлэлиир. Сылын ахсын өрөспүүбүлүкэтээҕи Олоҥхо ыһыаҕын ыытабыт, онно олоҥхоһуттар уонна олоҥхону чинчийээччилэр биир түһүлгэҕэ түмсэллэр. Олоҥхону букатын кыра саастарыттан кэрэхсээн толорор кырачаан тойуксуттар баар буолбуттарыттан сүргэбит көтөҕүллэр, кинилэр кэккэлэрэ сылын ахсын кэҥээн иһэр.

Бу дьоро күн Олоҥхо биһиги олохпутугар ураты суолтатын бэлиэтиэхпин баҕарабын. Олоҥхоҕо биһиги омукпут култуурунай куода – саха омук киһи буолар килбиэнэ, өлбөт-сүппэт силиһэ, тускулаах туруга кистэнэн сылдьар диэн бигэ итэҕэллээхпин. Биһиги олоҥхобут былыргы дьыллар былдьаһыктаах мындааларыгар, урукку дьыллар охсуһуулаах уорҕаларыгар тыйыс дойдуну сылаас тыыннаабыт саха омук эйэлээх суолу тэлэригэр, уйгулаах олоҕу уһанарыгар төһүү буолбут модун кыаҕын, өркөн өйүн, суолдьут сулуһун, духуобунай күүһүн туһунан дириҥ билиини биэрэр. Күндү доҕоттор! Олоҥхо дьиктилээх, түһүүлээх-тахсыылаах геройдуу олоҕун кэрэхсээҥ, күрүлүүр күүһүгэр сүгүрүйүҥ! Эһиэхэ саҥаны баһылааһыҥҥа ситиһиини уонна бары үтүөнү баҕарабын!

Саха Өрөспүүбүлүкэтин Ил Дархана       Айсен Николаев

Следите за самым важным и интересным в Telegram-канале и WhatsApp-группе ЯСИА