Ил Дархан Горнай улууһун Бэрдьигэстээх нэһилиэгэр 2021 сылга ыытыллыахтаах «Манчаары оонньуулара» XXI национальнай көрүҥнэргэ Спартакиадаҕа бэлэмнэнии үлэтин кытары билистэ. Айсен Николаев тутулла турар эбийиэктэри көрдө, видео-сибээс нөҥүө тэрийэр хамыһыйаны кытары мунньахтаата диэн, СИАҕа Ил Дархан уонна Бырабыыталыстыба пресс-сулууспата иһитиннэрэр.


Бэрдьигэстээххэ Ил Дархан 1000 миэстэлээх трибуналаах стадион тутуллар сирин көрдө, 50 миэстэлээх ытыы комплексын тутуутун билистэ. Бырайыак быһыытынан стадион 3000 эбии трибуналаах, сүүрэр суоллаах буолар.

Оонньуулары тэрийэр хамыһыйа салайааччыта, бырабыыталыстыба бэрэссэдээтэлин солбуйааччы э.т. Сергей Местников уонна улуус баһылыга Никита Андреев Горнай улууһугар оонньуулары көрсө барыта биэс эбийиэк тутулларын туһунан кэпсээтилэр. Үөһэ этиллибиттэртэн ураты бу сыл бүтүүтэ үлэҕэ киириэхтээх элбэх функциялаах спортивнай киин, ипподром саҥардыллыахтаах. Федеральнай бырагырааманан Матта өрүскэ сатыы дьон сылдьар, стадиоҥҥа быһа тиэрдэр муоста тутуллуохтаах.

Сергей Местников эппитинэн, билиҥҥитэ, үлэ кэмигэр баран иһэр, былаантан хаалыы суох.

Спортсменнары аһатыыга, олохсутууга 24 эбийиэк туһаныллыа, онтон 15 үөрэх тэрилтэтин эбийиэктэрэ, 4 административнай дьиэ, 2 спортивнай саала уонна тутулла турар интэринээт, элбэх квартиралаах олорор дьиэлэр. Култуурунай тэрээһиннэри ыытыыга 19 былаһаакканы бэлэмнииллэрин туһунан улуус баһылыга эттэ.

Айсен Сергеевич тутуу эбийиэктэрин таһынан олорор сири тупсарыы биир сүрүн сорук буоларын санатта.  Ил Дархан эргэ, хаарбах туруктаах дьиэлэри көтүрүүнү, нэһилиэк иһинээҕи суоллары саҥардыыны, оонньууга кэлээччилэр айаннарын боппуруостарын бырабыыталыстыбаҕа туһаайан туспа болҕомтоҕо ылалларын сүбэлээтэ.

«Нэһилиэги тупсарыы, хаарбах дьиэттэн көһөрүү, уот ситимнэрин уларытыы, суоллары тутуу үлэтэ тэтимнээхтик бара турар. Үлэ кэмигэр бүтэн, эһиил Бэрдьигэстээх тупсан, өрөспүүбүлүкэ биир бастыҥ нэһилиэгэ буолуо», — диэтэ А.Николаев

Тэрийэр хамыһыйа мунньаҕар дьиэлэр тас көрүҥнэрин тупсарар үлэлэр тустарынан, бөҕү быраҕар полигон тутуутун, уот ситимнэрин саҥардыы, нэһилиэги гаастааһын, канализацияны тутуу боппуруостарын ырыттылар. Сотору кэминэн Бэрдьигэстээх ыала бары гааска холбонуохтарын туһунан эттилэр.

Сиһилии манна аах https://ysia.ru/ajsen-nikolaev-proveril-hod-podgotovki-k-igram-manchaary-v-gornom-rajone/

Сигэн:

1
0

Хоруй суох

Хоруйдаа

Лимит времени истёк. Пожалуйста, перезагрузите CAPTCHA.