От ыйын 13 күнүгэр Москваҕа Ил Дархан эбээһинэһин быстах кэмҥэ толорооччу Айсен Николаев РФ Бэрэсидьиэнин дьаһалтатын салайааччытын солбуйааччы Магомедсалам Магомедовы кытта көрүстэ. РФ Госдууматыгар бастакы ааҕыылары ааспыт баҕа өттүнэн национальнай тыллары үөрэтии туһунан сокуону ырыттылар.
Айсен Сергеевич Саха сирин оскуолаларыгар, оҕо саадтарыгар саха тылын уонна хотугу аҕыйах ахсааннаах норуоттар тылларын баҕа өттүнэн үөрэтэллэрин бэлиэтээтэ. Оҕо ханнык тылы (нуучча тылыттан ураты), төһө өр үөрэтэрин төрөппүт быһаарар. Сахалыы кылааска үөрэниэн баҕалаах оҕо элбэҕин кэпсээтэ.
РФ Бэрисидьиэнин дьаһалтатын салайааччытын солбуйааччы Магомедсалам Магомедов саҥа сокуону ырытыыга Саха сирин уопсастыбаннаһа көхтөөхтүк кыттыбыттан астыммытын иһитиннэрдэ, махтанна. Маны таһынан, көрсүһүүгэ өрөспүүбүлүкэ иһигэр норуоттар сыһыаннаһыыларын эмиэ кэпсэттилэр.
Түмүккэ, Айсен Николаев Магомедсалам Магомедалиевичка Саха сиригэр норуоттар икки ардыларынааҕы сыһыан Сэбиэтин иһинэн ыытыллар тэрээһини ыытыахха диэн этии киллэрдэ. edersaas.ru
