Саха сирин инфраструктуратын кыһалҕаларын быһаарыыга 2019 сыл инникигэ хардыылары оҥордо. Бу туһунан регион баһылыга Айсен Николаев Ил Түмэҥҥэ сыллааҕы Этиитигэр бэлиэтээтэ.
«Биһиги баайбыт — киэҥ сиринэн тайыыр сирбит-уоппут, кыһалҕабыт — нэһилиэнньэлээх пууннарбыт икки ардыларын ырааҕа, айаҥҥа, тиэйиигэ-таһыыга ороскуота», — диэтэ Айсен Николаев.
Кини быйыл Россия президенэ Владимир Путин регионнар сайдыыларын инники күөҥҥэ туппутун бэлиэтээтэ.
«Айан-суол тоҕоостоох буолара — биир сүрүн соругунан буоларын бэлиэтиибин. Быһаарыы ыларга биһиги хамаандабыт туох-баар күүһүн-кыаҕын уурда уонна, биллэн турар, түмүк баар. Биһиги хотугу эргимтэ баһыйар күүһүн дакаастаатыбыт. Федераллары кытта бииргэ үлэлээн, Өлүөнэ муостатын тутуу наадалааҕын быһаарыстыбыт. Бу бырайыак олоххо киириитигэр Владимир Путин өйөбүлүн ыллыбыт. Өлүөнэ муостата — баар буолуоҕа», — диэтэ Николаев.
Регион салайааччыта эппитинэн, ахсынньы 10 күнүгэр тырааныспарга бырабыыталыстыба хамыыһыйатынан муоста тутуута Россия муосталарын тутуу бырагырааматыгар киллэрилиннэ.
«Биһиги Владимир Путин сорудаҕын толорууга күүспүтүн уонна кыахпытын түмүөхпүтүн наада, оччоҕуна Саха сирин олохтоохторун уһун кэмнэргэ ыра санаа оҥостон кэлбит баҕалара туолуоҕа», — диэтэ Ил Дархан.
