Видеонан быһа эфир кэмигэр өрөспүүбүлүкэ салайааччыта Айсен Николаев куораттар уонна улуустар баһылыктарыгар туһаайан, коронавирус инфекциятын нэһилиэнньэҕэ тарҕаппат туһугар салайан олорор сирдэригэр тустаах миэрэлэри ыларга бэлэм буолалларыгар эттэ.
«Мин муҥутуур бэлэм буолуу эрэһиимин киллэрэр туһунан ыйаах таһаардым. Коронавирус инфекцията тарҕамматын туһугар миэрэлэри ылыыга. Балаһыанньа уустук», — диэтэ Ил Дархан.
Саха сирин лидерэ эппитинэн, өрөспүүбүлүкэҕэ ыалдьыбыта быһаарыллыбыт киһи суох. Ити эрээри өрөспүүбүлүкэ оройуоннарыгар уонча киһи ыарыыга уорбаланар. Онон регион сиригэр-уотугар ЧС иннинээҕи эрэһиим олохтонно.
«Биһиги муниципалитеттар таһымнарыгар төһө кыалларынан элбэх дьону дьиэлэриттэн үлэлиир усулуобуйаларын тэрийэргитигэр сүбэлиибит», — диэн бэлиэтээтэ баһылык.
