Баһылык Айсен Николаев субуотаҕа куораты кэрийэн көрүү кэмигэр тутуу бара турар 25-с №-дээх оскуола былаһааккатыгар сырытта. Санатан эттэххэ, ааспыт нэдиэлэҕэ тустаах оскуола конструкцията сууллубута. Баһылык эбийиэги уонна маны туоратар үлэ хаамыытын билистэ. Ити туһунан Дьокуускай куорат уокуругун дьаһалтатын Уопсастыбаннаһы уонна сонуну киэҥник тарҕатар сириэстибэлэри кытта сибээскэ Департамена иһитиннэрэр.
“Газэнергомонтаж” ХЭУо территориальнай управлениетын начаалынньыга Андрей Урум кэпсээбитинэн, плитаны кутар кэмнэригэр көтөхтөрөр кыраан тутулла турар эбийиэк көмө баҕанатын (опалубка) таарыйбыт. Ол түмүгэр, биир сиринэн конструкция сууллубут. Кини этэринэн, ити улахан содулу таһаарбатах, тахсыбыт сатайыыны тута туораппыттар. Билигин оскуола тутуута эрэсиим быһыытынан барар.
Куорат баһылыга: “Итинник түгэннэр тутууга баар буолаллар. Күн бүгүн төрүөтэ быһаарыллан туоратыллыбыта, үлэ салҕанар. Ити оскуола ыйыллыбыт болдьоҕор үлэҕэ киирэригэр дьайбат”, — диэн эппит.
Бэйэбит инфо, edersaas.ru
Хаартыска: интэриниэттэн
