Ил Дархан Айсен Николаев Instagram-сирэйигэр суруйарынан, «Үйэлээх полк» аахсыйа Саха сиригэр ыам ыйын 9 күнүгэр сарсыарда 11.00 чааска онлайн-киэбинэн саҕаланыаҕа уонна НВК «Саха» ханаалынан көстүөҕэ, СИА суруйар.
«Үйэлээх полк» акцияны Россияҕа сылын аайы ыытар буолбуттара үтүө үгэскэ кубулуйда. Ити эрээри быйылгы дьылга коронавирус пандемията уларытыылары киллэрдэ — дьон сүгүрүйэр тэрээһинэ онлайн эрэһиимҥэ ыытыллыаҕа.
Эрдэ биллэриллибитин курдук, аахсыйа ыам ыйын 9 күнүгэр 11.000 чааска РФ регионнарыгар тэбис-тэҥҥэ старт биллэриэҕэ. Саха сирин олохтоохторо эмиэ кыттыһыахтара.
«Сылын аайы тыһыынчанан Саха сирин олохтооҕо үөрүү көтөллөөх, киэн туттуу аргыстаах Улуу сэриигэ кыттыбыт төрөппүттэрин, эһэлэрин, эбэлэрин, аймах-билэ дьоннорун хаартыскаларын тутан «Үйэлээх полка» сэлэлии хаамыытыгар кытталлара. Быйылгы үбүлүөйдээх сылга тапталлаах тэрээһиммит онлайн ыытыллыаҕа. НВК «Саха» уонна «Россия үйэлээх полката» портал көрдөрүөхтэрэ», — диэтэ Айсен Николаев.
Регион баһылыга санаппытынан, Улуу Сэрии геройдарыгар анаммыт уопсастыбаннай хамсааһын саайтыгар билигин хаартыскалары угуу тэрээһинэ ыытыллар. Кыайыы күнүгэр бу барыта анал платформаларга тохтоло суох көрдөрүүгэ таһаарыллыаҕа. Онон эһиги геройгут историятын аан дойду билэригэр «Россия үйэлээх полката» саайтка киирэн анал киэби толоруҥ. Маннык ВКонтакте уонна Одноклассники социальнай ситимнэргэ эмиэ бэриллэр.
«Дойдуга, аан дойдуга уустук кэмҥэ аахсыйа түмэр күүстээх. Эрэнэбин, ыам ыйын 9 күнүгэр бары бииргэ ааттаммыт платформаларынан киирэн, мустан, Улуу Сэрии хас биирдии кыттыылааҕын санаан ааһыахпыт», — диэтэ Ил Дархан.
