Ил Дархан видеоконференция сибээһинэн өрөспүүбүлүкэ сиригэр-уотугар2018 с. халааҥҥа сыһыаннаах федеральнай таһымнаах ыксаллаах быһыыны-майгыны туоратыыга мунньаҕы ыытта. Кини эмсэҕэлээбит оройуоннарга чөлүгэр түһэрэр үлэлэр түмүктэнэн эрэллэринэн, бастыҥ үлэһиттэри наҕараадалыырга этии киллэрдэ.
“Сааскы халаан содулун туоратыыга уһулуччу үлэлээх дьону, былаас бэрэстэбиитэллэрин, көннөрү да дьону наҕараадалыыр туһунан этии киллэрэргитигэр көрдөһөбүн. Кинилэр үлэлэрин түмүгүнэн муниципальнай тэриллиилэргэ хаһаайыстыбалар кылгас болдьоххо чөлүгэр түстүлэр”, — диэтэ Айсен Николаев.
Бу үлэҕэ федеральнай көмө эмиэ улахан оруоллааҕын санатта. “Арассыыйа Бырабыыталыстыбатыгар махтанабыт. Бэрэсидьиэни кытта кэпсэтээппин кытта үгүс кыһалҕалар быһаарыллыбыттара, үп кэмигэр кэлбитэ. Өрөспүүбүлүкэ бары муннугуттан көмөлөстүлэр, урбаанньыттар, көннөрү да дьон көмө-ама буоллулар”, — диэн Саха сирин баһылыга эбэн эттэ.
Өрөспүүбүлүкэ бырабыыталыстыбатын бэрэссэдээтэлин бастакы солбуйааччы Алексей Колодезников иһитиннэрбитинэн, ыйаах чэрчитинэн көрүллүбүт 26 тэрээһинтэн 22-тэ туолла. “Саха сирин Ил Дарханын ыйааҕын толорууга бары кыахтар туһанылыннылар. Бары эмсэҕэлээбит нэһилиэнньэлээх пууннарга эппиэттээх дьон бигэргэннилэр, ситэриилээх былаас уорганын бэрэстэбиитэллэрэ кыттыылаах оробуочай бөлөхтөр тэриллибиттэрэ”, — диэн Колодезников бэлиэтээтэ.
This post was published on 26.10.2018 16:53 16:53