Бүгүн бэс ыйын 5 күнүгэр Ил Дархан эбээһинэһин быстах кэмҥэ толорор Айсен Николаев халаантан эмсэҕэлээбит Халыма улуустарыгар айаннаата.
Бастакы суһал мунньаҕы Айсен Сергеевич Үөһээ Халыма оройуонугар ыытта. Бу улууска Зырянка уонна Үөһээ Халыма нэһилиэктэрин халаан уута ылбыта. Улуус баһылыгын э.т. Леонид Лысенко этэринэн, билигин уу таһыма түһэн эрэр, ол эрээри сөмөлүөт көтөр суола өссө даҕаны ууга сытар эбит. Зырянкаҕа халаан уутуттан 61 элбэх кыбартыыралаах уонна 15 чааһынай дьиэ, 657 киһи эмсэҕэлээбит. 101 учаастак уонна 13 км иэннээх 26 айан суола ууга барбыт.
СӨ бырабыыталыстыбатын бэрэссэдээтэлин бастакы солбуйааччы Алексей Колодезников иһитиннэрэринэн, нэһилиэнньэлээх пууну чөлүгэр түһэрии уонна эмсэҕэлээһин докумуоннарын бэс ыйын 14 күнүгэр диэри оҥоһуллан туттарыахтаахтар.
Ил Дархан эбээһинэһин быстах кэмҥэ толорооччу кыһыҥҥа диэри саҥа дьиэлэри тутар кыаллыбат диэн, оройуон салалтатыгар халаантан эмсэҕэлээбит дьон кыстыыр боппуруостарын быһаарарыгар, кэлэр 2019 сылга тутуу үлэтин күүскэ ыытарыгар сорудахтаата. «Кими даҕаны көмөтө суох хаалларыахпыт суоҕа», — диир Айсен Николаев. edersaas.ru
