Айсен Сергеевич, бастатан туран, Саха сиригэр халаан уутугар эмсэҕэлээбиттэргэ уонна социальнай эбийиэктэри чөлүгэр түһэриигэ федерацияттан 587 мөл. солк. кэмигэр көрүллэн, улахан көмө буолбутун бэлиэтээтэ. Санатан эттэххэ, быйыл 63 нэһилиэнньэлээх пуун ууга баран федерация таһымыгар ыксаллаах быһыы-майгы биллэриллибитэ. Федерацияттан кэмигэр көмө кэлэн, өрөспүүбүлүкэ бүттүүнэ турунан халаан уутугар эмсэҕэлээбит нэһилиэктэр бары кыстыкка бэлэм буолбуттара. Манна даҕатан, Дмитрий Анатольевич көрүллүбүт үп-ас дьоҥҥо-сэргэҕэ түргэнник тиийбитин, социальнай эбийиэктэр чөлүгэр кэмигэр түспүттэрин, туруоруллубут сыал ситиһиллибитин бэлиэтээн эттэ.
Доруобуйа харыстабылыгар кэлиҥҥи сылларга модернизация, ол эбэтэр саҥаны киллэрии баран, ону сэргэ оптимизация (үлэ көдьүүһүн көрүү) ыытыллан, дойду үрдүнэн үгүс уларыйыы тахсыбыта. Ол түмүгэр үгүс эрэгийиэҥҥэ балыыһалар, фельдшерскэй-акушерскай пууннар кыччатыллыбыттара, доруобуйа харыстабылыгар үбүлээһин методиката уларыйбыта. Ити биһиэхэ, киэҥ-куоҥ сирдээх өрөспүүбүлүкэҕэ, охсуулаах буолан тахсыбыта. Бастакытынан, балыыһалар, фельдшерскэй пууннар аччааһыннара биһиэхэ тыын боппуруос. Онон кэлиҥҥи сылларга өрөспүүбүлүкэ салалтата балыыһалары сарбыйтарбат туһугар үлэни-хамнаһы ыыппыта. Иккиһинэн, методика уларыйан, Медицинскэй страховка федеральнай фондатыттан үбүлээһини ситэри ылбат буолбута. Ол түмүгэр, балыыһалар материальнай-техническэй базаларын өттүгэр оҕустарбыттара. Бу сайын Айсен Николаев Уһук Илин эрэгийиэннэр сайдыыларын мунньаҕар, онтон Дмитрий Медведевкэ доруобуйа харыстабылыгар көрүллэр үбүлээһини ааҕыы методикатын уларытыыга үгүс кэпсэтиини ыыппыта. Ол кэпсэтиитэ түмүктээх буолан, өрөспүүбүлүкэ эһиил эбии 6,7 млрд солк. ылыаҕа.
“Бу методика уларыйбытын түмүгэр, доруобуйа харыстабылыгар бастакы уочаракка турар кыһалҕалар быһаарыллыахтара. Ол иһигэр хамнас улаатыаҕа, эминэн-томунан хааччыллыы ситэриллиэҕэ. Билигин искэни, сүрэҕи эмтиир диспансердарбыт тутууларыгар боппуруостар бааллар”, — диэн бэлиэтиир Айсен Сергеевич.
Түмүккэ, Дмитрий Медведев бу уларыйбыт саҥа методика хайдах үлэлиирэ салгыы үөрэтиллиэҕин, итиннэ көннөрүү баран доруобуйа харыстабылын систиэмэтигэр эбии үп көрүллүбүтэ сөптөөҕүн бэлиэтээтэ.
Аграфена КУЗЬМИНА, “Саха сирэ” хаһыат.
This post was published on 15.11.2018 14:43 14:43