Бүгүн, ыам ыйын 10 күнүгэр, 15.00 чааска Ил Дархан Айсен Николаев НВК «Саха» ханаалынан коронавируһунан ылыныллыбыт миэрэлэри түһүмэҕинэн көтүрүүгэ аналлаах ыҥырыы оҥордо.
Бу күннэргэ өрөспүүбүлүкэтээҕи суһал штаб сыстыганнаах дьаҥынан баар балаһыанньаны дьүүллэһиигэ мунньах ыытта. Муниципалитеттар баһылыктарын кытта сүбэлэстэ. Роспотребнадзор этиилэрин иһиттэ. Салгыы кинилэр этиилэрин учуоттаан туран, быһаарыылары ылла.
Арктика эргимтэтигэр, ыарахан суоллаах-иистээх нэһилиэнньэлээх пууннарга бары хааччахтааһыннар тохтотуллаллар. Ити эрээри тэрээһиннэргэ 50-тан элбэх киһи мустуо суохтаах.
Дьокуускайга, Жатайга, Аллараа Бэстээххэ, Тиксиигэ, Нерюнгрига, Мииринэйгэ, Ленскэйгэ урона Покровскайга самоизоляция эрэһиимэ ыам ыйын 31 күнүгэр диэри уһатыллар. Ательелар, химчисткалар, атах таҥаһын өрөмүөннээччилэр, ол эбэтэр бытовой өҥөнү клиены кытта алтыһыыта суох оҥорооччулар, үлэлиэхтэрин сөп. Спордунан сибиэһэй салгыҥҥа биирдиилээн дьарыктаныы эмиэ көҥүллэнэр. Балаһыанньа тупсан истэҕин аайы хааччахтааһыннар уһуллан иһиэхтэрэ.
Тыа сирдэригэр атыы тэрилтэлэрэ, парикмахерскайдар үлэлиэхтэрин сөп. Тоһоҕолоон бэлиэтиибин, атыы тэрилтэлэригэр уонна бытовой өҥөнү оҥорооччулар бэччээкилээх уонна мааскалаах үлэлиииргит ирдэнэр. Бэйэ-бэйэттэн тэйиччи сылдьыы уонна дезинфекциялааһын булгуччулаах.
Ыам ыйын 12 күнүттэн Алдаҥҥа харантыын тохтуур. Ити эрээри куоракка самоизоляция эрэһиимэ тутуһуллар.
Өрөспүүбүлүкэ баһылыга эппитинэн, оскуолаларга үөрэх дьыла ыам ыйын 30 күнүгэр диэри түмүктэниэхтээх.
