Өлүөнэ эбэни туоратар муоста чугастааҕы сылларга тутуллуоҕа, бу туһунан Саха сирин Ил Дарханын э.т. Айсен Николаев Владивостокка түмүктэнэн эрэр Илиҥҥи экономическай форумҥа пресс-конференцияҕа иһитиннэрдэ. Сөбүлэһии бырайыагын өрөспүүбүлүкэ бырабыыталыстыбата бэлэмниир.
Саха сирин Ил Дарханын э.т. өрөспүүбүлүкэ иннигэр тырааныспар инфраструктуратын олоххо киллэриигэ сөҕүмэр соруктар туралларын, ол иһигэр Өлүөнэ муостатын тутуу туһунан эттэ.
“Дьокуускай куорат оройуонугар Өлүөнэ муостата чугастааҕы сылларга тутуллуоҕа уонна концессионнай сөбүлэһиигэ олоҕуруоҕа. Билигин маннык сөбүлэһии барылын өрөспүүбүлүкэ бырабыыталыстыбата бэлэмниир”, — диэтэ Николаев.
Кини этэринэн, бырайыакка бөдөҥ хампаанньалар өттүлэриттэн интэриэс баар. Форум чэрчитинэн Саха сирин бырабыыталыстыбатын, “ВИС хампаанньалар бөлөхтөрүн уонна CRCC – China Railway Bridge Engineering Bureau Group Co. Ltd. икки ардыларыгар меморандумҥа илии баттаспыттара. Бу сөбүлэһиигэ олоҕуран өрүттэр Саха сиригэр массыына суолун инфраструктуратын тэрийии бырайыагын олоххо киллэриини былаанныыллар, ол иһигэр Өлүөнэ муостатын тутууга концессионнай сөбүлэһиини оҥоруу киирэр.
Айсен Николаев Владимир Путины кытта атырдьах ыйын 29 күнүгэр көрсүһүүтүгэр судаарыстыба баһылыга РФ бырабыыталыстыбатыгар бу боппуруоһу быһааралларыгар сорудахтаабыта.
Алена Павлова, СИА. 

0
0
comments powered by HyperComments